2024 جىلعى 30 جەلتوقساندا ق ر ۇكىمەتى «قازاقستان رەسپۋبليكاسىنىڭ پرەزيدەنتى جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسى تۋرالى كەيبىر ماسەلەلەر» اتتى قاۋلىنى قابىلدادى. بۇل تۋرالى Vecher.kz حابارلايدى.
قۇجاتتا: «قازاقستان رەسپۋبليكاسىنىڭ پرەزيدەنتى جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسى» كوممەرسيالىق ەمەس اكسيونەرلىك قوعامىن قازاقستان رەسپۋبليكاسىنىڭ پرەزيدەنتى جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسى مارتەبەسىندەگى ەڭ جوعارعى عىلىمي ۇيىمعا قايتا قۇرۋ» دەپ كورسەتىلگەن.
اكادەميانىڭ نەگىزگى قىزمەت تۇرلەرى:
قازاقستاننىڭ الەۋمەتتىك-ەكونوميكالىق دامۋ باسىمدىقتارىنا سايكەس عىلىم مەن عىلىمي-تەحنيكالىق قىزمەتتىڭ باسىم باعىتتارىن انىقتاۋ بويىنشا ۇسىنىستار ازىرلەۋ؛
عىلىم مەن تەحنولوگيالاردىڭ ستراتەگيالىق باسىم باعىتتارىن تالداۋ جانە ونى پرەزيدەنت جانىنداعى ۇلتتىق عىلىم جانە تەحنولوگيالار كەڭەسىنە ۇسىنۋ؛
باعدارلامالىق-نىسانالى قارجىلاندىرۋ ءۇشىن ۇسىنىلعان عىلىمي-تەحنيكالىق تاپسىرمالاردى ساراپتامادان وتكىزۋ؛
عىلىمنىڭ دامۋ بولاشاعى بويىنشا بولجامدىق زەرتتەۋلەر دايىنداۋ؛
عىلىم سالاسىنداعى اتاۋلى سىيلىقتار مەن ستيپەنديالارعا ارنالعان بايقاۋلار وتكىزۋ؛
عىلىم مەن تەحنيكا سالاسىندا زەرتتەۋلەر جۇرگىزۋ؛
عىلىمي جۋرنالدار شىعارۋ؛
حالىقارالىق عىلىمي جانە عىلىمي-تەحنيكالىق ىنتىماقتاستىقتى دامىتۋعا قاتىسۋ؛
عىلىمدى ناسيحاتتاۋعا قاتىسۋ.
قازاقستان رەسپۋبليكاسىنىڭ پرەزيدەنتى جانىنداعى ۇلتتىق عىلىم اكادەمياسى – ەلدەگى ءتۇرلى ءبىلىم سالالارى بويىنشا جەتەكشى عالىمدار مەن زەرتتەۋشىلەردى بىرىكتىرەتىن جالعىز جوعارعى عىلىمي ۇيىم. اكادەميا قازاقستاندا عىلىم، تەحنولوگيا جانە يننوۆاسيالاردى دامىتۋدا ماڭىزدى ءرول اتقارادى، عىلىمي زەرتتەۋلەردى ىلگەرىلەتىپ، ءبىلىم تاراتۋعا جانە حالىقارالىق ىنتىماقتاستىقتى نىعايتۋعا ىقپال ەتەدى.
اقىلبەك كۇرىشبايەۆ:
– وتكەن جىلى اكادەميا جانىنان اناليتيكالىق ورتالىق قۇرىلىپ، ەلىمىزدەگى عىلىمنىڭ جاعدايى تالداندى، ەلدىڭ عىلىمي الەۋەتىنىڭ دەرەكتەر بازاسى جاسالدى. باعدارلامالىق-نىسانالى قارجىلاندىرۋ اياسىندا 113 عىلىمي-تەحنيكالىق تاپسىرما ساراپتامادان وتكىزىلدى. حالىقارالىق ىنتىماقتاستىقتى دامىتۋ شەڭبەرىندە الەمنىڭ جەتەكشى عىلىمي ۇيىمدارىمەن 27 مەموراندۋمعا قول قويىلدى. ولاردىڭ نەگىزىندە نەمىس، كورەي جانە قىتايلىق زەرتتەۋ قۇرىلىمدارىمەن بىرگە ءۇش حالىقارالىق عىلىمي ورتالىق اشىلىپ، اقش جانە جۇڭگو عىلىم اكادەميالارىمەن ءۇش حالىقارالىق عىلىمي جوبا جۇزەگە اسىرىلا باستادى. ءبىز عىلىم سالاسىندا جاڭا جەتىستىكتەر مەن ترانسفورماسيالاردىڭ الدىندا تۇرمىز. ءبىزدىڭ ماقسات – قازاقستاندى ورتالىق ازياداعى عىلىمي زەرتتەۋلەردىڭ كوشباسشىسى ەتۋ. عىلىم اكادەمياسى جاڭا يدەيالار مەن ۇسىنىستارعا اشىق، – دەپ اتاپ ءوتتى ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ.
ەسكە سالساق، 2024 جىلدىڭ 20 جەلتوقسانىندا الماتى قالاسىندا عىلىمي قاۋىمداستىققا پرەزيدەنت جانىنداعى ۇلتتىق عىلىم اكادەمياسىنىڭ جاڭا سايلانعان اكادەميكتەرى تانىستىرىلدى.