قارجى نارىقتارىنداعى گەوساياسي تاۋەكەلدەر مەن قۇبىلمالىلىقتىڭ ءوسۋى اياسىندا قارجى نارىعىنىڭ تۇراقتىلىعىن قامتاماسىز ەتۋ جانە تەڭگەدەگى دەپوزيتتەردىڭ تارتىمدىلىعىن قولداۋ ءۇشىن قازاقستان رەسپۋبليكاسىنىڭ ۇلتتىق بانكى قازاقستان رەسپۋبليكاسىنىڭ ۇكىمەتىمەن بىرلەسىپ بيۋدجەت قاراجاتىنىڭ ەسەبىنەن جەكە تۇلعالاردىڭ دەپوزيتتەرى بويىنشا وتەماقى (سىيلىقاقى) ەسەپتەۋدى كوزدەيتىن تەڭگەدەگى سالىمداردى قورعاۋ باعدارلاماسىن ىسكە اسىراتىن بولادى.
باعدارلاماعا قاتىسۋعا 2022 جىلعى 23 اقپان كۇنىنىڭ سوڭىنداعى جاعداي بويىنشا سالىمدارعا كەپىلدىك بەرۋ جۇيەسىنە قاتىسۋشى – ءبىر نەمەسە بىرنەشە ەكىنشى دەڭگەيدەگى بانكتە جانە «وتباسى بانك» اكسيونەرلىك قوعامىندا اشىلعان جەكە تۇلعالاردىڭ تەڭگەدەگى سالىمدارى قاتىسادى. باعدارلاما اعىمداعى جانە كارتوچكالىق شوتتارعا، سونداي-اق تالاپ ەتىلگەنگە دەيىنگى دەپوزيتتەرگە جانە شارتتى دەپوزيتتەرگە قولدانىلمايدى.
10% مولشەرىندەگى وتەماقى (سىيلىقاقى) ءاربىر بانكتە 1 ادامعا 2022 جىلعى 23 اقپان كۇنىنىڭ سوڭىنداعى قالدىقتار شەگىندەگى جالپى سومادا، ءبىراق باعدارلامانى ىسكە اسىرۋ باستالعان كەزدەن باستاپ 12 ايدان كەيىن 20 ملن تەڭگەدەن اسپايتىن سوماداعى (سالىمنىڭ ناقتى سوماسى 20 ملن تەڭگەدەن اسپايتىن بولسا، سول سومادان استام ەمەس) كورسەتىلگەن سالىمدارعا 1 رەت ەسەپتەلەدى. وتەماقىعا (سىيلىقاقىعا) جەكە تابىس سالىعى سالىنبايدى.
ەكىنشى دەڭگەيدەگى بانكتەگى سالىم مەرزىمىنىڭ سوڭىنا دەيىن، ءبىراق تەتىك ەنگىزىلگەن ساتتەن باستاپ كەمىندە 12 اي، ياعني 2023 جىلعى 24 اقپانعا دەيىن سالىمدى ساقتاۋ سىيلىقاقىنى ەسەپتەۋ ءۇشىن مىندەتتى تالاپ بولىپ تابىلادى. ەگەر سالىم مەرزىمى وتەماقى (سىيلىقاقى) تولەنگەنگە دەيىنگى كەزەڭدە اياقتالسا، دەپوزيت باعدارلامانىڭ اياقتالۋ مەرزىمىنە دەيىن ۇزارتىلۋى ءتيىس. سالىمدى ءىشىنارا الۋ كەزىندە وتەماقىنى (سىيلىقاقىنى) تولەۋ جوعارىدا كورسەتىلگەن ليميتتەردى ەسكەرە وتىرىپ، اقشا الىنعاننان كەيىن سالىم قالدىعىنىڭ سوماسىنا جۇزەگە اسىرىلادى.
جۋىردا ۇكىمەت پەن ۇلتتىق بانكتىڭ ءتيىستى اكتىلەرى قابىلداناتىن بولادى. باعدارلاماعا قاتىسۋ ءۇشىن سالىمشىلار سالىم ورنالاسقان ەكىنشى دەڭگەيدەگى بانككە بارىپ ءوتىنىش بەرۋى قاجەت.