بۇل كورسەتكىش وتكەن جىلعا قاراعاندا 20%-عا جوعارى.
ال ورتاشا كورسەتكىش 7%-عا ارتىپ، شامامەن 68 بالدى قۇرادى. ەڭ جوعارى بالل 135 بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
مينيسترلىكتىڭ مالىمەتىنشە، قاڭتارداعى ۇلتتىق ءبىرىڭعاي تەستىلەۋگە بارلىعى 102 مىڭعا جۋىق ادام قاتىستى. ونىڭ ىشىندە تۇلەكتەردىڭ 78،3%-ى قازاق تىلىندە، 21،5%-ى ورىس تىلىندە، 0،16%-ى اعىلشىن تىلىندە تەستىلەۋدەن ءوتتى. قاڭتار ايىنداعى ۇبت-عا ەرەكشە ءبىلىم بەرۋدى قاجەت ەتەتىن 99 بالا قاتىستى.
بىلتىر وسى كەزەڭدە كورۋ، ەستۋ، تىرەك-قيمىل اپپاراتى بۇزىلعان 33 تالاپكەر تەست تاپسىرعان بولاتىن. ايتا كەتەتىنى، بيىل العاش رەت ەرەكشە قاجەتتىگى بار تۇلەكتەرگە تەستىلەۋ تاپسىرمالارىن ورىنداۋ ءۇشىن نەگىزگى 240 مينۋتتان بولەك، تاعى قوسىمشا 40 مينۋت ۋاقىت بەرىلدى. سونىمەن قاتار وسى تۇلەكتەر ءۇشىن سىزبالارسىز، دياگراممالارسىز جانە سحەمالارسىز تەست نۇسقالارى ارنايى ازىرلەندى.
«قاڭتارداعى ۇبت بيىلعى 25 قاڭتار مەن 22 اقپان ارالىعىندا 42 وڭىرلىك تەستىلەۋ ورتالىعىندا ءوتتى. تەستىلەۋ وسىمەن ەكىنشى جىل قاتارىنان ەلەكتروندى فورماتتا جۇرگىزىلىپ كەلەدى. تەستىلەۋ كەزىندە تالاپكەرلەر سۇراقتارعا قايتا ورالا الادى جانە قاعاز بلانك تولتىرۋعا ۋاقىت جۇمسامايدى. وسىلايشا، ۇبت ناتيجەلەرى جاقسارىپ، ورتاشا بالل ايتارلىقتاي ءوستى. سونداي-اق ەلەكتروندى فورمات تەستىلەۋدىڭ اشىقتىعىن قامتاماسىز ەتۋگە مۇمكىندىك بەردى. ورناتىلعان كامەرالاردىڭ ارقاسىندا تەستىلەۋ كەزىندە ەرەجە بۇزۋ فاكتىلەرى دە ايتارلىقتاي ازايدى. تۇلەكتەردىڭ باسىم بولىگى وزىنە جانە ءوز بىلىمىنە سەنەتىنى قۋانتادى»، – دەيدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.