وتكەن جىلدىڭ سوڭىندا رەسپۋبليكالىق كوميسسيانىڭ شەشىمىمەن 569 قازاقستاندىققا “بولاشاق” باعدارلاماسى بويىنشا حالىقارالىق ستيپەنديا تاعايىندالعان بولاتىن.
ءبىر قۋانىشتىسى – ستيپەنديا يەگەرلەرى اراسىندا ق ر ءىىم م.ەسبولاتوۆ اتىنداعى الماتى اكادەمياسىنىڭ پروفەسسورلىق-وقىتۋشىلىق قۇرامىنىڭ وكىلدەرى دە بار.
كيبەرقاۋىپسىزدىك جانە اقپاراتتىق تەحنولوگيالار كافەدراسىنىڭ باستىعى، فيلوسوفيا عىلىمدارىنىڭ دوكتورى (PhD) ا. بەكىشيەۆ پەن جەدەل ىزدەستىرۋ قىزمەتى كافەدراسىنىڭ دوسەنتى، فيلوسوفيا عىلىمدارىنىڭ دوكتورى (PhD) ە. ناسىروۆا اقپان ايىنان باستاپ م. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە عىلىمي تاعىلىمدامادان وتۋدە، دەپ حابارلايدى Almaty-akshamy.kz
ولار عىلىمي تاعىلىمداما كەزىندە بىلىكتىلىكتى ارتتىرۋ كۋرستارىنان ءوتىپ، عىلىمي شارالارعا قاتىسادى جانە عىلىمي-زەرتتەۋ جۇمىستارىن جۇرگىزەدى. اكادەميا عالىمدارى تاعىلىمدامادان ءوتىپ جاتقان زاڭ فاكۋلتەتى م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە 1755 جىلى قۇرىلعان. بۇگىندە فاكۋلتەت زاڭ عىلىمىنىڭ ءارتۇرلى سالالارىندا عىلىمي-زەرتتەۋ جۇمىستارىنىڭ اۋقىمدى باعدارلاماسىن جۇزەگە اسىرادى، رەسەي زاڭناماسىن جەتىلدىرۋگە ەلەۋلى ۇلەس قوساتىن فاكۋلتەت عالىمدارى مەملەكەتتىك جانە حالىقارالىق ورگاندارعا قۇقىقتىق ماسەلەلەر بويىنشا عىلىمي كەڭەس بەرەدى، زاڭ جوبالارىن ازىرلەۋگە قاتىسادى.
جۋىردا الماتى اكادەمياسى كاسىبي ءبىلىم بەرۋ فاكۋلتەتىنىڭ باستىعى، زاڭ عىلىمدارىنىڭ كاندياتى د. ەرەمەيەۆ اتالعان فاكۋلتەتكە كەلىپ، “بولاشاق” باعدارلاماسى بويىنشا عىلىمي تاعىلىمدامادان ءوتىپ جاتقان ارىپتەستەرىمەن اڭگىمەلەستى جانە زاڭ فاكۋلتەتىنىڭ تاريحىمەن، وقۋ-ادىستەمەلىك، عىلىمي-زەرتتەۋ قىزمەتىمەن تانىستى. سونداي-اق ول ساپار بارىسىندا اتالعان فاكۋلتەت وكىلدەرىمەن ءوزارا ىنتىماقتاستىق تۋرالى ماسەلەلەرى تالقىلادى.