ق ر ۇقك مەن ءىىم رەسەيلىك فەدەرالدىق قاۋىپسىزدىك قىزمەتى جانە ىىم-مەن بىرگە ارنايى وپەراسيا وتكىزدى، دەپ حابارلايدى اlmaty-akshamy.kz ق ر ۇقك باسپا ءسوز قىزمەتىنە سىلتەمە جاساپ.
مەملەكەت باسشىسى تاپسىرماسىنىڭ اياسىندا قازاقستان رەسپۋبليكاسى ۇلتتىق قاۋىپسىزدىك كوميتەتى مەن ىشكى ىستەر مينيسترلىگى ۇيىمداسقان قىلمىستىڭ ەلدەگى الەۋمەتتىك-ەكونوميكالىق جاعدايعا تيگىزەتىن اسەرىن تومەندەتۋ بويىنشا جۇمىستى جالعاستىرۋدا.
2022 جىلعى 3 قاڭتاردا ق ر ۇقك مەن ءىىم رەسەيلىك فەدەرالدىق قاۋىپسىزدىك قىزمەتى جانە ىىم-مەن بىرگە بايقوڭىر قالاسىندا قۇرامىنا قازاقستان جانە رەسەي ازاماتتارى كىرگەن قوعامعا ءقاۋىپتى ۇيىمداسقان قىلمىستىق توپتىڭ جولىن كەسۋ بويىنشا بىرلەسكەن ارنايى وپەراسيانى ىسكە اسىردى.
ءبىر ۋاقىتتا استانا، قىزىلوردا جانە قونايەۆ قالالارىندا اتالعان توپتىڭ كومەكشىلەرى ۇستالدى. جالپى، ارنايى وپەراسيا بارىسىندا ۇيىمداسقان قىلمىستىق توپتىڭ 18 باسشىسى مەن بەلسەندى مۇشەلەرى ۇستالدى. ولاردىڭ تۇرعىلىقتى جەرلەرى بويىنشا اتىس قارۋى، اقشالاي قارجى جانە تەرگەۋ ءۇشىن قىزىعۋشىلىق تۋدىراتىن وزگە دە ماتەريالدار الىندى.
قىلمىستىق توپتىڭ ادام ۇرلاۋعا، بوپسالاۋعا، قارۋمەن قاراقشىلىق شابۋىلداۋعا جانە ۇرلىققا قاتىسى بارى انىقتالدى. قىلمىستىق ەلەمەنتتەر ۇزاق ۋاقىت بويى بايقوڭىر قالاسى جانە قىزىلوردا وبلىسىنداعى قىلمىستىق احۋالعا كەرى اسەر ەتىپ كەلىپ، اۋىر جانە اسا اۋىر قىلمىستاردى جاساۋداعى قاتىگەزدىكتەرىمەن ەرەكشەلەنگەن.
مىسالى، 2022 جىلعى قىركۇيەكتە قىلمىستىق توپتىڭ قاتىسۋشىلارى اراسىنداعى قارۋلى قاقتىعىس سالدارىنان كوشەدەن ءوتىپ بارا جاتقان بەيبىت ادامعا وق ءتيىپ، وقيعا ورنىندا كوز جۇمعان.
ۇقك قىزمەتكەرلەرى ارنايى وپەراسيانى پروكۋراتۋرامەن كەلىسە وتىرىپ، جەدەل ىزدەۋ جانە تەحنيكالىق ءىس-شارالاردىڭ كەشەنىن جۇرگىزۋ ارقىلى كوپ ايلار بويى تىڭعىلىقتى ازىرلەپ كەلگەن.
قازىرگى ۋاقىتتا سوت الدى تەرگەۋ اياسىندا ۇستالعانداردىڭ وزگە دە قىلمىستارعا قاتىسىنىڭ بار-جوعى تەكسەرىلۋدە جانە قاجەتتى تەرگەۋ امالدارى جۇرگىزىلۋدە.