ەرلان قارين 2022 جىلى قانداي ماڭىزدى جۇمىستار اتقارىلعانىن ايتتى
ق ر مەملەكەتتىك كەڭەسشىسى ەرلان قارين ءوتىپ بارا جاتقان 2022 جىلعا قورىتىندى جاسادى، دەپ حابارلايدى almaty-akshamy.kz
«2022 جىل قازاقستاننىڭ بۇكىل جاڭا تاريحىنداعى ەڭ قيىن، دەگەنمەن ەڭ ماڭىزدى جىلداردىڭ بىرىنە اينالدى. ول نەسىمەن ەستە قالدى؟ ونىڭ باستى ساياسي ترەندتەرى قانداي؟ وسى جەردە بىرنەشە ءساتتى اتاپ وتكىم كەلەدى. قاڭتار وقيعاسىنان كەيىن جانە حالىقارالىق شيەلەنىستىڭ ۋشىعۋ اياسىندا قوعامدا شوعىرلانۋعا دەگەن ناقتى ءبىر سۇرانىس قالىپتاستى. جانە دە وسى سۇرانىس ماۋسىمداعى رەفەرەندۋم بارىسىندا كورىنىس تاپتى. ونىڭ قورىتىندىسىندا ساياسي تۇرعىدا ەلىمىزدەگى ازاماتتاردىڭ شوعىرلانۋىنىڭ جاڭاشا تولىعىپ، جاڭا دەڭگەيى بەلگىلەندى. ءوز كەزەگىندە، قاراشا ايىندا وتكەن پرەزيدەنتتىك سايلاۋ ناتيجەسى قوعام مەن مەملەكەتتە ەلدىڭ مۇنان ارعى دامۋ كەلەشەگىنە ورتاق تۇسىنىك بار ەكەندىگىن كورسەتتى. سوندىقتان ءوتىپ بارا جاتقان جىلدىڭ باستى ساياسي قورىتىندىلارىنىڭ ءبىرى بيلىك قوعامنىڭ شوعىرلاۋىنا قولداۋ بىلدىرە الدى جانە بەلگىلى ءبىر جاڭا دەڭگەيگە شىعاردى»، - دەپ جازدى ەرلان قارين تەلەگرام كانالىندا.
ونىڭ پايىمىنشا، 2022 جىلدى جان-جاقتى رەفورمالار جىلى دەپ تولىقتاي ايتۋعا بولادى. جىل ىشىندە پرەزيدەنت ەكى مارتە جولداۋ جاساپ، وندا قوعامدىق-ساياسي جانە الەۋمەتتىك-ەكونوميكالىق سالادا تۇبەگەلى قايتا قۇرۋعا باستاماشىلىق جاسادى. ناتيجەسىندە ساياسي جاڭعىرۋدىڭ اۋقىمدى باعدارلاماسى ىسكە قوسىلىپ، كونستيتۋسيالىق رەفورما جاسالدى. دەمونوپوليزاسيالاۋ جانە ەكونوميكانى قۇرىلىمدىق قايتا قۇرۋ پروسەسى باستالىپ، ءۇش جاڭا وبلىس قۇرىلدى.
«بيىل باستاما جاسالعان جانە ىسكە قوسىلعان بۇل رەفورمالار مۇنان ارى العا جىلجۋ ءۇشىن سەرپىن بەرەدى. سوندىقتان وسى جىلداعى پرەزيدەنتتىك رەفورمالار كەلەسى 2023 جىلدىڭ دا ساياسي كۇنتارتىبىن ايقىنداۋدى جالعاستىرادى دەپ ايتۋعا بولادى. ءوتىپ بارا جاتقان جىلدا قوعامدىق الاڭدا ازداعان ترانسفورماسيا باستالدى. ەلدىڭ قوعامدىق-ساياسي ومىرىندە جاڭا تۇلعالار پايدا بولدى، جاڭا قوزعالىستار مەن بىرلەستىكتەر، ونىڭ ىشىندە پارتيالار وزدەرى جايىندا مالىمدەي باستادى. ال ءبىرىنشى ۇلتتىق قۇرىلتايدىڭ شاقىرىلۋى جالپىۇلتتىق ديالوگتى جاڭا ينستيتۋسيونالدىق دەڭگەيگە شىعاردى. قازاقستان 2022 جىلى دا بەلسەندى سىرتقى ساياسات جۇرگىزدى. تۋىنداعان كۇردەلى گەوساياسي احۋالعا قاراماستان ەلىمىز سىندارلى، ءبىراق، بۇل رەتتە قارقىندى سىرتقى ساياسي باعداردى جۇرگىزۋىن جالعاستىردى. ءبىز ءوزىمىزدىڭ بارلىق باستى سەرىكتەستەرىمىزبەن ءوزارا ءتيىمدى ىنتىماقتاستىعىمىزدى دامىتتىق. پرەزيدەنتتىڭ جۇڭگو، رەسەي، تۇركيا، ءباا، يران، قاتار، ساۋد ارابياسى، ازەربايجان، فرانسيا جانە وزبەكستانعا ساپارى جاھاندىق تۋربۋلەنتتىلىك جاعدايىندا ەلىمىزدىڭ كوپۆەكتورلى سىرتقى ساياساتىنا جاڭا مازمۇن بەردى. قحر ءتوراعاسى سي ءسزينپيننىڭ پاندەميا باستالعاننان بەرگى ءبىرىنشى شەتەلدىك ساپارىنىڭ، سونىمەن قاتار ريم پاپاسى فرانسيسكتىڭ اپوستولدىق ساپارىنىڭ قازاقستانعا جاسالۋى ماڭىزدى وقيعاعا اينالدى»، - دەدى مەملەكەتتىك كەڭەسشى.
ەرلان قارين ءوتىپ بارا جاتقان جىل ساراپشىلىق قوعامدىق ءۇشىن دە بازالىق قوعامدىق قۇندىلىقتاردىڭ جاڭا جۇيەسىن ىزدەۋ توڭىرەگىندەگى باستالۋىمەن دە ەستە قالماق. قوعامدا جاڭا قۇندىلىق ماتريساسىن قالىپتاستىرۋ ءۇشىن مەملەكەت ەڭبەك يدەولوگياسى مەن ىنتىماقتاستىقتى، ءبىلىم بەرۋ مادەنيەتىن، تابيعاتقا ۇقىپتى قاراۋدى ماقساتتى تۇردە ىلگەرىلەتە باستادى.
«بالكىم، وسى جىلدىڭ ەڭ ءساتتى يدەولوگيالىق باستامالارىنىڭ ءبىرى - ءبىزدىڭ زاماناۋي مەملەكەتتىلىگىمىزدى بەينەلەيتىن نەگىزگى ۇلتتىق مەرەكە رەتىندە رەسپۋبليكا كۇنىن قايتارۋ بولعان شىعار. وسىلايشا، وسى جىلدى قورىتىندىلاي كەلە مەملەكەتتىلىگىمىز ءۇشىن كوپتەگەن تەڭدەسىز سىن-تەگەۋىرىندەردى ەڭسەرۋمەن، ەلىمىزدىڭ جان-جاقتى جاڭعىرا باستاۋىمەن ەستە قالادى دەپ ايتۋعا بولادى»، - دەدى ەرلان قارين.