قاراعاندىلىق ۆەلومارافونشى، اعىلشىن ءتىلى ءمۇعالىمى، جۋرناليست ەرنات مەلس ۇلى اس-سۋسىز 109 شاقىرىم جولدى 7 ساعات 10 مينۋتتا ەڭسەردى.
وسىلايشا ول قازاقستان رەكوردىن ورناتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ناتيجەنى قازاقستاننىڭ رەكوردتار كىتابىنىڭ رەسمي وكىلى قۋاندىق قۇدايبەرگەنوۆ تىركەدى. جاقىن ارادا ارنايى سەرتيفيكات تابىستالادى.
«مارافونشىلار ادەتتە جەڭىل جانە جىلدام ۆەلوسيپەد تاڭدايدى، ال ەرنات تاۋدا جۇرەتىن اۋىر ۆەلوسيپەدكە وتىردى. ارينە، رەكورد مويىنداۋعا لايىق»، - دەپ اتاپ ءوتتى قۋاندىق قۇدايبەرگەنوۆ.
ۆەلومارافون نۇر-سۇلتان قالاسىنىڭ اينالما جولىمەن ءوتتى. جارىس 11:47-دە باستالىپ، 19:28-دە اياقتالدى. ۆەلوسيپەدشى حازىرەت سۇلتان مەشىتىنىڭ الدىنا كەلىپ توقتادى. ەرناتتىڭ ايتۋىنشا، ول مۇسىلمان قاۋىمى ءۇشىن قاسيەتتى رامازان ايىنىڭ سوڭعى 30-شى كۇنىنە ارنايى ۆەلومارافون جوسپارلاعان. جەتىستىكتى قازاقستان حالقىنىڭ بىرلىگى كۇنىنە دە ارنادى.
«ۆەلوشەرۋدەن كەيىن ءوزىمدى جاقسى سەزىنەمىن. بولاشاقتا ەلىمىز بەن حالقىمىزدى دارىپتەۋگە ۇلەس قوسۋ ءۇشىن الەم بويىنشا ساياحاتتاعىم كەلەدى. تامىز ايىنىڭ سوڭىندا احمەت بايتۇرسىنوۆ دۇنيەگە كەلگەن اقكول اۋىلىنان ەۋروپاعا حالىقارالىق ۆەلوجارىس وتكىزۋدى جوسپارلاپ وتىرمىن. باعىتتى باتىس قازاقستان، اتىراۋ، اقتاۋ، ءازىربايجاننىڭ استاناسى باكۋ ارقىلى وتكىزىپ، يۋنەسكو-نىڭ شتاب-پاتەرى ورنالاسقان پاريجدە اياقتاعىم كەلەدى. احمەت بايتۇرسىنوۆتىڭ ءومىرى مەن شىعارماشىلىعىن، قازاق حالقىنىڭ مادەنيەتىن، سونداي-اق ابايدىڭ «تولىق ادام» يدەياسىن ءتۇرلى قالالار مەن ەلدەردە كوپشىلىككە تاراتقىم كەلەدى»، - دەدى ەرنات مەلس ۇلى.