ەلىمىزدە ءتاتتى سۋسىندار مەن شىرىندار قىمباتتايدى

قازاقستاندا الكوگولسىز سۋسىندار مەن شىرىنداردىڭ باعاسى كوتەرىلەدى

وندىرۋشىلەر اسسوسياسياسى الداعى ۋاقىتتا باعانى قايتا قاراماقشى. ولار ءوز ونىمدەرىنىڭ قۇنىن قانتتىڭ قىمباتتاۋىنا بايلانىستى وسىرمەكشى، دەپ حابارلايدى Almaty-akshamy.kz Elorda.info-عا سىلتەمە جاساپ.

"وندىرۋشىلەر ءوز ونىمدەرىنىڭ باعاسىن ۇستاپ تۇرۋعا تىرىسۋدا. الايدا بۇل ۇزاققا سوزىلا المايدى، سەبەبى نەگىزگى ينگرەديەنت – قانتتىڭ باعاسى ءوسىپ جاتىر. سايكەسىنشە، وندىرۋشىلەر دە تاۋارلارىن قىمباتتاتۋعا ءماجبۇر. شامامەن 7-20% ارالىعىندا دەپ ويلايمىن. ءقازىر وندىرۋشىلەردىڭ كوپ بولىگى شىعىندى وڭتايلاندىرۋ جولدارىن ىزدەپ جاتىر. سونىمەن قاتار جۇمىسشىلار سانىن قىسقارتۋ دا بار"، – دەدى الكوگولسىز ىشىمدىك وندىرۋشىلەرى اسسوسياسياسىنىڭ پرەزيدەنتى ءاليا مامىتبايەۆا. 

قانت سوڭعى ءۇش ايدا ايتارلىقتاي قىمباتتاي تۇسكەن. EnergyProm ساراپشىلارىنىڭ مالىمەتىنشە، تەك ناۋرىز ايىندا باعا 33%-عا، ءبىر جىلدا ەكى ەسەگە وسكەن. 

كوكتەمنىڭ باسىندا ەڭ قىمبات قانت نۇر-سۇلتاندا ساتىلعان. مۇندا تۇتىنۋشىلار ءبىر كەلىسى ءۇشىن 450 تەڭگە تولەگەن. كەيىنگى ورىنعا الماتى مەن قوستاناي ورنالاستى. ال ەڭ ارزان قانت تاراز قالاسىندا بولدى. 

ءقازىر الماتىداعى ازىق-تۇلىك دۇكەندەرىندە قانت 500-650 تەڭگەگە ساتىلىپ جاتىر. شاقپاق قانتتىڭ ءبىر قاپتاماسىنىڭ قۇنى 1 000 تەڭگەگە دەيىن جەتەدى. سونداي-اق ەلدە قانت ءوندىرىسى دە قىسقارعان. وتاندىق زاۋىتتار قاڭتار مەن ناۋرىز ايلارىنىڭ ارالىعىندا 51 مىڭ توننا قانت وندىرگەن. بۇل وتكەن جىلعىمەن سالىستىرعاندا 20%-عا از.