2025 جىل اياقتالىپ كەلەدى، جىل قورىتىندىسىن شىعاراتىن ۋاقىت تا جەتتى. قازاقستاندىق رەگبيشىلەر رەگبي-7 بويىنشا ەلىمىزدىڭ جوعارى ليگا كوماندالارى اراسىنداعى ىشكى چەمپيوناتتى دا ءساتتى اياقتادى.
ەرلەر كوماندالارى اراسىنداعى جۇلدەلى ورىندار كەلەسىدەي ءبولىندى:
- وف «ازياسپورت-دينامو» (الماتى ق.)
- پرك «وليمپ» (تالدىقورعان ق.)
- «كاسپيي» (اقتاۋ ق.)
ايەلدەر كوماندالارى اراسىندا:
- وف «ازياسپورت-دينامو» (الماتى ق.)
- سديۋشور № 1 (تالدىقورعان ق.)
- «وليمپ» (تالدىقورعان ق.)
رەگبي-7 بويىنشا ەرلەر جانە ايەلدەر ۇلتتىق قۇرامالارىنىڭ ويىندارىندا ايتارلىقتاي ىلگەرىلەۋ بايقالادى. وڭتۇستىك افريكا رەسپۋبليكاسىنان كەلگەن بەلگىلى ماماندارمەن بىرلەسە جاتتىقتىرۋ باستالعالى بەرى ەكى قۇرامانىڭ دا ويىن دەڭگەيى ەداۋىر ءوسىپ وتىر. ايەلدەر قۇراماسىنىڭ باس جاتتىقتىرۋشىسى – فابيان دجۋريس، ال ەرلەر قۇراماسىنىڭ جاتتىقتىرۋشىلارى – Ludwiche Hermanuss پەن Johannes Zariascharias.
ەرلەر قۇراماسىنىڭ كاپيتانى راسۋلماگومەد ماگومەدوۆتىڭ ايتۋىنشا، بيىل تامىز ايىندا وڭتۇستىك افريكا رەسپۋبليكاسىندا ەرلەر جانە ايەلدەر قۇرامالارى ءۇشىن وتكەن ءۇش اپتالىق وقۋ-جاتتىعۋ جيىندارىنىڭ ماڭىزى ەرەكشە بولدى. جاتتىعۋ جيىندارىن قازاقستان رەگبي فەدەراسياسى ۇيىمداستىردى. ءبىزدىڭ سپورتشىلار رەگبي №1 سپورت ءتۇرى بولىپ سانالاتىن ەلدە بولىپ قايتتى. مۇندا بالالار رەگبيمەن 5 جاستان باستاپ شۇعىلدانادى، ال وار ۇلتتىق قۇراماسى ءار جىلدارى الەم چەمپيونى اتانعان. جيىن بارىسىندا قازاقستان كوماندالارى اۋقىمدى جۇمىس اتقارىپ، جەرگىلىكتى مىقتى ۇجىمدارمەن جولداستىق كەزدەسۋلەر وتكىزىپ، باعا جەتپەس تاجىريبە جينادى.
قازان ايىنىڭ ورتا تۇسىندا ايەلدەر ۇلتتىق قۇراماسى شري-لانكادا وتكەن، ازيا چەمپيوناتىنا تەڭەستىرىلگەن ازيا سەرياسىنىڭ كەزەڭىنە قاتىستى. جارىستا 12 ايەلدەر كومانداسى ب ا ق سىنادى، ال قازاقستان قۇراماسى بەسىنشى ورىنعا يە بولدى. دايىندىقتىڭ قازىرگى دەڭگەيىن ەسكەرسەك، بۇل – ءسوزسىز ۇلكەن جەتىستىك.
25–26 قازاندا ومان ەلىندە وتكەن “Asia Rugby Emirates Men’s Seven Trophy 2025” حالىقارالىق تۋرنيرىندە قازاقستاننىڭ ەرلەر قۇراماسى التىن مەدال جەڭىپ الدى. ازيانىڭ 16 كومانداسى قاتىسقان دودادا قازاقستاندىق رەگبيشىلەر بەس ماچتىڭ بارىندە جەڭىسكە جەتتى. قىرعىزستان، ساۋد ارابياسى، كاتار، اۋعانستان، ءۇندىستان كوماندالارىن سەنىمدى تۇردە ۇتىپ، ايقىن باسىمدىق كورسەتتى. بۇل جەڭىس قازاقستاننىڭ ازيا رەگبي-7 ليگاسىنىڭ جوعارى ديۆيزيونىنا قايتا ورالۋىنا جول اشتى.
قاراشا ايىنىڭ سوڭىندا ەرلەر جانە ايەلدەر قۇرامالارى “Emirates Dubai 7s” تۋرنيرىنە قاتىستى. ەرلەر كومانداسى «International Open Men» ديۆيزيونىندا ونەر كورسەتتى. مۇندا ازيا قۇرلىعىنىڭ ۇلتتىق جانە كلۋبتىق كوماندالارى سايىسقا ءتۇستى. قازاقستان قۇراماسى 14 كوماندانىڭ ىشىندە 5-ورىنعا يە بولىپ، تۇراقتى ويىن ورنەگىن جانە جەڭىسكە دەگەن جوعارى جىگەرىن كورسەتتى.
ايەلدەر قۇراماسى شاقىرىلعان كوماندالار مەن ەكىنشى قۇرامالار ويناعان II ديۆيزيوندا سىنعا ءتۇستى. ولاردىڭ قاتارىندا برازيليا، اۆستراليا، جۇڭگو جانە بەلگيا كوماندالارى بولدى. قازاقستاندىق رەگبيشى قىزدار 9-ورىن الىپ، ماڭىزدى حالىقارالىق تاجىريبە جينادى جانە كوماندالىق رۋحتى كۇشەيتتى.
سونداي-اق Dubai 7s تۋرنيرىندە قازاقستان اتىنان ونەر كورسەتكەن ارداگەرلەر كومانداسىنىڭ قاتىسۋى دا نازار اۋدارارلىق جايت. ولار 10-ورىن يەلەندى. بۇل دا قازاقستاندا رەگبيدىڭ بارلىق دەڭگەيدە بەلسەندى دامىپ، مىقتى سپورتتىق داستۇرلەر قالىپتاستىرىپ كەلە جاتقانىن كورسەتەدى.
«ءبىز بيىل بارلىق كوماندالارىمىزدىڭ جەتىستىكتەرىن ماقتان تۇتامىز. ءار ويىن، ءار ماچ سپورتشىلاردىڭ جەكە دامۋى مەن حالىقارالىق ارەنادا قازاقستاندىق رەگبيدىڭ بەدەلىن نىعايتۋ جولىنداعى ماڭىزدى كەزەڭ بولدى»، – دەپ اتاپ ءوتتى قازاقستان رەگبي فەدەراسياسى.
جينالعان تاجىريبە 2026 جىلعا ارنالعان دايىندىقتىڭ بەرىك ىرگەتاسى بولماق. كوماندالاردىڭ جوسپارىنا جاڭا حالىقارالىق تۋرنيرلەرگە قاتىسۋ، ويىنشىلاردىڭ بىلىكتىلىگىن ارتتىرۋ جانە جاس سپورتشىلاردى قولداۋعا باعىتتالعان باعدارلامالاردى جۇيەلى تۇردە دامىتۋ كىرەدى.
فەدەراسيا قازاقستان رەسپۋبليكاسى تۋريزم جانە سپورت مينيسترلىگىنە، سپورت جانە دەنە شىنىقتىرۋ ىستەرى كوميتەتىنە جانە باس سەرىكتەسى – SportyQory-عا ەرەكشە العىسىن بىلدىرەدى. ءدال وسى قولداۋ كوماندالارعا ءوز سپورتتىق ماقساتتارىنا قول جەتكىزۋگە جانە الەمدىك رەگبيدە قازاقستاننىڭ پوزيسياسىن نىعايتۋعا مۇمكىندىك بەرىپ وتىر. سەرىكتەستەرمەن بىرلەسكەن جۇيەلى جۇمىس تۇراقتى وسۋگە جانە حالىقارالىق ارەنالاردا تابىستى ونەر كورسەتۋگە قولايلى جاعداي جاسايدى.