قازاقستان قىتايعا اۋىل شارۋاشىلىعى ونىمدەرىن جەتكىزۋ الەۋەتىن كەڭەيتەدى

قازاقستان ەت جانە ەت ونىمدەرىن، ءسۇت جانە ءسۇت ونىمدەرىن جەتكىزۋدى ۇلعايتۋعا مۇددەلى.

قىتايدىڭ ۇكىمەتى شىعىس قازاقستان وبلىسىنىڭ ساپا ينسپەكسياسىنىڭ زەرتحاناسىنا قۇنى 11،15 ملن يۋان بولاتىن جابدىقتى تاپسىرادى. بۇل ق ر اۋىل شارۋاشىلىعى مينيسترلىگى مەن قحر كوممەرسيا مينيسترلىگى اراسىندا قول جەتكىزىلگەن ۋاعدالاستىقتىڭ ارقاسىندا مۇمكىن بولىپ وتىر، دەپ حابارلايدى Almaty-akshamy.kz اشم سىلتەمە جاساپ.

قحر ءتوراعاسى سي ءسزينپيننىڭ قازاقستانعا مەملەكەتتىك ساپارى اياسىندا ءتيىستى كەلىسىمگە ق ر اۋىل شارۋاشىلىعى ءمينيسترى ەربول قاراشوكەيەۆ پەن قحر-دىڭ قازاقستانداعى توتەنشە جانە وكىلەتتى ەلشىسى چجان سياو قول قويدى.

قحر ستاندارتتارى بويىنشا اككرەديتتەلگەن زەرتحانا قۇرۋ قىتايعا وتاندىق اۋىل شارۋاشىلىعى ونىمدەرىنىڭ ەكسپورتىن ۇلعايتۋعا ىقپال ەتەدى. بۇدان باسقا، قازاقستان تەرەڭ قايتا وڭدەۋ تاۋارلارىن، جەمشوپ پەن قوسپالارىن، ەت جانە ەت ونىمدەرىن، ءسۇت جانە ءسۇت ونىمدەرىن جەتكىزۋدى ۇلعايتۋعا مۇددەلى.

ايتا كەتەيىك، 2022 جىلدىڭ 7 ايىنىڭ قورىتىندىسى بويىنشا، اوك سالاسىنداعى قازاقستان-قىتاي تاۋار اينالىمى 46،7% ارتىپ، 412،5 ملن دوللاردى قۇرادى.

وتاندىق اۋىل شارۋاشىلىعى ونىمدەرىنىڭ ەكسپورتى 62،2% - 280،4 ملن دوللارعا دەيىن ءوستى. قىتايدان يمپورت 22،2% ۇلعايىپ، 132،1 ملن دوللاردى قۇرادى.