2024 جىلعى 6 جەلتوقساندا ق ر قم مەملەكەتتىك كىرىستەر كوميتەتى ءتوراعاسىنىڭ ورىنباسارى باقىتجان سلياموۆتىڭ، ق ر جۇڭگو حالىق رەسپۋبليكاسىنداعى ەلشىلىگى وكىلدەرىنىڭ، سونداي-اق قازاقستان مەن قىتايدىڭ وڭىرلىك كەدەن جانە شەكارا قىزمەتتەرى باسشىلارىنىڭ قاتىسۋىمەن «باقتى» - «پوكيتۋ» وتكىزۋ پۋنكتىندە ۋاقىتشا جولاۋشىلار وتكەلىنىڭ اشىلۋ سالتاناتى ءوتتى، دەپ حابارلايدى aqshamnews.kz
باقىتجان سلياموۆ ءوزىنىڭ قۇتتىقتاۋ سوزىندە ۋاقىتشا جولاۋشىلار وتكەلىنىڭ اشىلۋى قازاقستان مەن جۇڭگو وڭىرلەرى اراسىنداعى مادەني-گۋمانيتارلىق، ساۋدا جانە ەكونوميكالىق الماسۋلار ءۇشىن جاعدايلاردى جاقسارتۋعا باعىتتالعانىن اتاپ ءوتتى.
ءىس-شارا شەڭبەرىندە ءتوراعا ورىنباسارىنىڭ تاچەن وكرۋگىنىڭ پارتكوم حاتشىسى چجي سيانۆەيمەن ەكىجاقتى كەزدەسۋى ءوتتى، وندا تاراپتار 2025 جىلى «باقتى» - «پوكيتۋ» وتكىزۋ پۋنكتىنىڭ تولىق اشىلۋ پەرسپەكتيۆالارىن تالقىلادى. كەلىسسوز بارىسىندا قازاقستان-قىتاي شەكاراسىنداعى ءۇشىنشى تەمىرجول وتكەلىنىڭ قۇرىلىسى دا قوزعالدى.
سونىمەن قاتار، كەزدەسۋگە قاتىسۋشىلار كەدەندىك رەسىمدەۋدى ۇدايى جەتىلدىرۋ جانە وسى وتكىزۋ پۋنكتىندە وتكىزۋ مۇمكىندىگىن ارتتىرۋ تۋرالى ۋاعدالاستى. اشىلۋ سالتاناتى ەكىجاقتى قاتىناستاردى ودان ءارى دامىتۋ جانە قازاقستان مەن جۇڭگو اراسىنداعى ءتۇرلى سالالارداعى ىنتىماقتاستىقتى نىعايتۋ جولىنداعى ماڭىزدى قادام بولدى.