قازاقستان قىلمىستىق قۇقىقتىق سالادا 34 مەملەكەتپەن 72 ەكىجاقتى كەلىسىمگە قول قويعان.
سەناتتىڭ جالپى وتىرىسىندا «قازاقستان مەن فرانسيا اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاسيالاۋ تۋرالى» زاڭ ماقۇلداندى، دەپ حابارلايدى Almaty-akshamy.kz
باس پروكۋروردىڭ ورىنباسارى اسەت شىندالييەۆتىڭ ايتۋىنشا، بۇگىندە قازاقستان قىلمىستىق قۇقىقتىق سالادا 34 مەملەكەتپەن 72 ەكىجاقتى كەلىسىمدى بەكىتكەن. ونىڭ ىشىندە ەۋروپاداعى 16 ەلمەن 35 شارت جاساسقان. ولاردىڭ اراسىندا ۇلىبريتانيا، يسپانيا، يتاليا، موناكو، ۆەنگريا جانە تاعى باسقا مەملەكەتتەر بار.
«قىلمىستىق ىستەر بويىنشا قۇقىقتىق كومەك كورسەتۋ تۋرالى 29 شارتقا قول قويىلدى. جاسىرىن جۇرگەن ادامدى ۇستاپ بەرۋ تۋرالى 21 شارت بەكىتىلدى. سوتتالعان ادامداردى بەرۋ تۋرالى كەلىسىم 22 ەلمەن جاسالدى. وسىنداي حالىقارالىق شارتتاردى جاساۋدا ءبىز تۋريستىك ەكونوميكالىق قارىم-قاتىناس دامىعان ەلدەرگە باسىمدىق بەرەمىز»، - دەدى اسەت شىندالييەۆ.
قازاقستان مەن فرانسيا قىلمىستىق ءىستى بىرىگىپ تەرگەۋگە مۇمكىندىك بەرەتىن كەلىسىمگە توقتالدى.
مۇنداي شارتتار تاراپتارعا ءبىرقاتار قۇقىقتىق مىندەتتى جۇكتەيدى. شارت كۇشىنە ەنگەن سوڭ تاراپتار بىر-بىرىنە جولداعان قۇقىقتىق كومەك تۋرالى سۇراۋلاردى ورىنداۋعا مىندەتتى بولادى. ورىنداۋدان باس تارتسا، وندا جازباشا تۇردە ناقتى جاۋاپ بەرۋگە ءتيىس. سونداي-اق ءىستى تەرگەۋگە بايلانىستى ءبىر ەلدەن ەكىنشى ەلگە شاقىرىلعان كۋاگەرلەر مەن ساراپشىلارعا شاقىرعان تاراپ قىلمىستىق قۋدالاۋدان يممۋنيتەت بەرەدى، - دەدى باس پروكۋروردىڭ ورىنباسارى.
اسەت شىندالييەۆ كەلىسىمنىڭ نەگىزگى تالابىنا توقتالدى.
«ۇسىنىپ وتىرعان شارت ءوزارا قۇقىقتىق كومەك كورسەتۋ نەگىزدەرى مەن ءتارتىبىن، ولاردى جۇزەگە اسىرۋ جولدارىن، كۋاگەر مەن ساراپشى، ايىپتالۋشىنى شاقىرتۋ، ولاردان جاۋاپ الۋ، كۇزەتپەن ۇستالىپ وتىرعان ادامدى ۋاقىتشا الدىرۋ جانە تاعى باسقا ماسەلەلەردى رەتتەيدى. ناقتى ايتقاندا سۇراۋ سالۋ، زاتتاردى تاركىلەۋ، ءتىنتۋ، ساراپتاما جۇرگىزۋ، بانكتەردەگى شوتتاردى انىقتاۋ، كۋاگەر جانە ساراپشى، ايىپتالۋشىدان جاۋاپ الۋ، اقپارات الماسۋ جانە تاعى باسقا تەرگەۋ امالدارىن قامتيدى. مىسالى، فرانسيادا ءتىنتۋ جۇرگىزۋ قاجەت بولعاندا قازاقستاننىڭ قۇقىق قورعاۋ ورگاندارى سۇراۋ جولدايدى. وعان تەرگەۋ سوتى سانكسيا مەن قاۋلىنى قوسا بەرەدى. فرانسيا تەرگەۋ ورگانى ءوزىنىڭ ۇلتتىق زاڭناماسى نەگىزىندە ءتىنتۋ جاسايدى. ونىڭ ناتيجەسىن بىزگە حابارلايدى. ءدال وسىنداي تارتىپپەن فرانسيادان تۇسكەن سۇراۋلاردى قازاقستاننىڭ تەرگەۋ ورگاندارى ورىندايدى. ونىڭ ىشىندە فرانسيا سوتىمەن سانكسيالانعان قاۋلىنى ءبىزدىڭ تەرگەۋ سوتى راستايدى. ال تەرگەۋ ارەكەتتەرىن قازاقستان زاڭىنا سايكەس ءبىزدىڭ تەرگەۋ ورگاندارى جۇرگىزەدى. مۇنداي شارتتار تەرگەۋدىڭ تولىقتىعىن قامتاماسىز ەتۋگە مۇمكىندىك بەرەدى، - دەدى ول.
داۋىس بەرۋ ناتيجەسىندە زاڭ جوباسى ماقۇلداندى.
بۇگىندە قازاقستاننىڭ فرانسياداعى ەلشىلىگىندە جانە ستراسبۋرگتەگى باس كونسۋلدىقتا قازاقستاننىڭ 629 ازاماتى ەسەپتە تۇر. ونىڭ 149-ى فرانسيادا تۇراقتى تۇرۋعا قۇجاتتارىن راسىمدەگەن.
سونداي-اق قازاقستاندا 532 فرانسيا ازاماتى بار: 84ء-نىڭ تۇرۋعا ىقتيارحاتى بولسا، 448ء-ى ۋاقىتشا ەسەپتە تۇر.