قابىلداۋدى اپاتتار مەديسيناسىنىڭ بىلىكتى دارىگەرلەرى جۇرگىزۋدە.
قازاقستان توتەنشە جاعدايلار مينيسترلىگىنىڭ دارىگەرلەرى تۇركيا رەسپۋبليكاسىنىڭ گازيانتەپ قالاسىندا مەديسينالىق كومەك كورسەتۋ پۋنكتىن اشتى دەپ حابارلايدى اlmaty-akshamy.kz ءتجم-نىڭ باسپا ءسوز قىزمەتىنە سىلتەمە جاساپ.
مالىمەتتەر بويىنشا، جويقىن جەر سىلكىنىسىنەن كەيىن ىزدەستىرۋ-قۇتقارۋ جۇمىسىن جۇرگىزۋ ءۇشىن تۇركياعا جىبەرىلگەن قازاقستان قۇتقارۋشىلارىنىڭ قۇرامىندا اپاتتار مەديسيناسى ورتالىعىنىڭ ماماندارى بار.
دارىگەرلەر العاشقى مەديسينالىق-سانيتارلىق كومەك كورسەتۋ ءۇشىن پنيەۆموكاركاستى مودۋل ورناتتى. ول – تۇرعىندارعا بىلىكتى كومەك كورسەتۋگە ارنالعان دالالىق مەديسينالىق پۋنكت. قابىلداۋدى اپاتتار مەديسيناسىنىڭ بىلىكتى دارىگەرلەرى جۇرگىزۋدە.
«گازيانتەپ قالاسىنىڭ تۇرعىندارىن تاۋلىك بويى قابىلداۋ بارىسىندا اپاتتار مەديسيناسى ورتالىعىنىڭ دارىگەرلەرى جيىرماعا جۋىق ناۋقاسقا، ولاردىڭ ىشىندە ەكى بالاعا كونسۋلتاسيالىق جانە بىلىكتى مەديسينالىق كومەك كورسەتتى. ادامدار وسى پۋنكتكە كوبىنەسە جىلىنۋعا، تۋىستارى مەن جاقىندارىن قۇتقارۋشىلار تاۋىپ العانشا كۇتۋگە كەلەدى. ويتكەنى كوپشىلىگى باسپاناسىز قالدى.
تجم پنيەۆموكاركاس مودۋلدەرىن وتكەن جىلى ساتىپ العانىن اتاپ وتكەن ءجون. اتالعان دالالىق مەديسينالىق گوسپيتال ءىرى ءزىلزالالار مەن اپاتتار تۋىنداعان كەزدە ورنالاستىرۋعا ارنالعان. مۇنداي ءموبيلدى اۋرۋحانا تولىق ورنالاستىرىلعان كەزدە كۇنىنە 200-گە جۋىق زارداپ شەككەن ادامدى قابىلداي الادى.
ءوز ءومىرىن قاۋىپ-قاتەرگە تىگىپ، تۇركياداعى ءزىلزالا ورنىندا اۋىر جاعدايدا قىزمەت اتقارىپ جاتقان قۇتقارۋشىلاردىڭ دا دەنساۋلىعىن ساقتاۋ - تجم مەديسينا قىزمەتكەرلەرىنىڭ باستى مىندەتتەرىنىڭ ءبىرى. دارىگەرلەردىڭ ايتۋىنشا، بۇگىنگى كۇنى تۇركياداعى تجم جەكە قۇرامىنىڭ دەنساۋلىعى جاقسى، ولار پسيحولوگيالىق تۇرعىدان ساۋ»، - دەلىنگەن مينيسترلىك مالىمەتىندە.