ۇكىمەتتە جاستار ساياساتى جانە ءبىلىم بەرۋ سالاسىن دامىتۋ جوبالارى قارالدى.
2029 جىلعا قاراي 2،3 ميلليون جاستى جۇمىسپەن قامتۋ جوسپارلانىپ وتىر. بۇل تۋرالى بۇگىن پرەمەر-مينيستر ءاليحان سمايىلوۆتىڭ توراعالىعىمەن وتكەن كەڭەستە ايتىلدى، دەپ حابارلايدى اlmaty-akshamy.kz ق ر ۇكىمەتىنىڭ Telegram-كانالىنا سىلتەمە جاساپ.
كەڭەستە جاستار ساياساتى جانە مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋدى دامىتۋ تۇجىرىمدامالارىنىڭ جوبالارى قارالدى.
اقپارات جانە قوعامدىق دامۋ ءمينيسترى دارحان ءقىدىرالى جاستار ساياساتى تۇجىرىمداماسىنىڭ جوباسى 6 باعىت پەن 10 نىسانالى ينديكاتوردى جانە 72 ءىس-شارانى قامتيتىنىن ايتتى.
«ءبىز 2029 جىلعا قاراي مەملەكەتتىك قولداۋ شارالارى تۋرالى جاستاردىڭ حاباردارلىعىن 90% دەيىن، ۆولونتەرلىك، قايىرىمدىلىق جانە ەكولوگيالىق باستامالارعا تارتىلۋ دەڭگەيىن 32% دەيىن ارتتىرۋدى كوزدەپ وتىرمىز»، — دەدى د. ءقىدىرالى.
سونىمەن قاتار تۇجىرىمداما جوباسى جاس كاسىپكەرلەردىڭ ۇلەسىن 30% دەيىن، جۇمىسپەن قامتۋ ورتالىقتارىنا جۇگىنگەندەر اراسىنان جۇمىسقا ورنالاستىرىلعان جاستاردىڭ ۇلەسىن 61% دەيىن ۇلعايتۋدى كوزدەيدى.
2029 جىلعا قاراي 2،3 ميلليون جاستى جۇمىسپەن قامتۋ جوسپارلانۋدا، ونىڭ 1 ميلليونى – اۋىل تۇرعىندارى. سونىمەن قاتار اۋىلدىق جەرلەردە تۇراتىن 1،5 ميلليون جاس قازاقستاندىق سيفرلىق ساۋاتتىلىققا وقىتىلاتىن بولادى.
تەحنيكالىق جانە كاسىپتىك ءبىلىم بەرۋ جۇيەسىندە قازاقستاندىق جاستاردىڭ كوللەدجدەردە سۇرانىسقا يە ماماندىقتار بويىنشا تەگىن ءبىلىم الۋىنا باسا نازار اۋدارىلدى.