قازاقستان قۇتقارۋشىلارى جوعالعان تۋريستەردى ىزدەستىرىپ جاتىر

وگەم وزەنىنىڭ بويىنان جوعالعان تۋريستەردىڭ زاتتارى تابىلدى.

قازاقستان قۇتقارۋشىلارى 15 تاۋلىك بويى ىزدەستىرۋ جۇمىستارىن جالعاستىرىپ جاتىر. ولار وگەم وزەنىنىڭ بويىنان ءالى تابىلماعان تۋريستەردىڭ زاتتارىن تاۋىپ، پوليسياعا  تابىستاعان، دەپ حابارلايدى Almaty-akshamy.kz.

«بۇگىن ساعات 13:10-دا تۇركىستان وبلىسى تولە بي اۋدانىنىڭ ايعىرجىققان جانە وگەم وزەندەرىنىڭ قوسىلعان تۇسىنان 500 مەتر قاشىقتىقتا جوعالعان تۋريستەردىڭ زاتتارى (جەمپىر، اياق ءقيىم، ۇيىقتاۋعا ارنالعان قاپ) تابىلدى. تجم قۇتقارۋشىلارى ولاردى پوليسيا قىزمەتكەرلەرىنە تابىستادى. تۋريستەردىڭ ءبىرىنىڭ اناسى تابىلعان زاتتاردىڭ اراسىنان ءوز بالاسىنىڭ كيىمىن تانىدى»، – دەپ حابارلادى ق ر تجم رەسمي وكىلى تالعات ءۋالي.

قازىرگى ۋاقىتتا جوعالعان ەكى ءتۋريستى ىزدەۋ جۇمىستارى جالعاستىرىلۋدا. ايماقتا «قازاۆياقۇتقارۋ» اق تىكۇشاعىمەن  اەروۆيزۋالدى بارلاۋ جۇمىستارى جۇرگىزىلۋدە.

ىزدەستىرۋ جۇمىستارى 15 تاۋلىك بويى جالعاسۋدا. وعان تۇركىستان وبلىسى تج، پوليسيا دەپارتامەنتتەرىنەن،  ۇقك شەكارا قىزمەتىنەن، ورمان شارۋاشىلىعىنان، وزبەكستان رەسپۋبليكاسى تجم جەكە قۇرامىنان 137 قىزمەتكەر، 17 بىرلىك تەحنيكا، 1 تىكۇشاق جانە جوعالعان تۋريستەردىڭ تۋىستارى جۇمىلدىرىلدى. ىزدەۋ جۇمىستارى توعىز باعىتتا جۇرگىزىلۋدە.

ەستەرىڭىزگە سالا كەتەيىك، بۇعان دەيىن جوعالعان ءۇش تۋريست قۇتقارىلىپ، ەكەۋىنىڭ دەنەسى تابىلعان بولاتىن. 

تۇركىستان وبلىسىندا جوعالعان جەتى تۋريست تۋرالى العاشقى اقپارات 25 مامىردا جاريالانعان بولاتىن. 29 مامىردا ءۇش تۋريست امان-ەسەن تابىلىپ، تاعى ەكەۋىنىڭ ءمايىتى تابىلعان. قازىرگى كەزدە قۇتقارۋشىلار قالعان ەكى ءتۋريستى ىزدەستىرىپ جاتىر.