دوكتورانتۋراعا ءتۇسۋ ەمتيحاندارى 2021 جىلى العاش رەت ەلەكتروندىق فورماتتا وتەدى.
بۇل تۋرالى "Antikor.Live" جوباسى شەڭبەرىندە ءبىلىم جانە عىلىم ءمينيسترى اسحات ايماعامبەتوۆ باياندادى، دەپ حابارلايدى Almaty-akshamy.kz. ق ر ءبىلىم جانە عىلىم مينيسترلىگىنىڭ سايتىنا سىلتەمەلەپ.
ۆەدومستۆو باسشىسىنىڭ ايتۋىنشا، وتكەن جىلى ماگيستراتۋراعا ءتۇسۋ كەزىندە تەستىلەۋدىڭ ەلەكتروندىق فورماتى اپروباسيادان ءساتتى وتكەن.
"وتكەن جىلى ماگيستراتۋراعا العاش رەت پيلوتتىق رەجيمدە ەلەكتروندىق فورماتتا قابىلدادىق. بيىل دا بۇل ءراسىم ەلەكتروندىق فورماتتا وتەدى. ءبىز بۇل مەحانيزم سىبايلاس جەمقورلىق تاۋەكەلدەرىن جويۋ تۇرعىسىنان وتە دۇرىس جانە ءتيىمدى ەكەنىن بايقادىق. ەندى ماگيستراتۋراعا قابىلداۋ تۇراقتى نەگىزدە ەلەكتروندىق فورماتتا جۇزەگە اسىرىلادى"، – دەپ اتاپ ءوتتى اسحات ايماعامبەتوۆ.
ۆەدومستۆو باسشىسى مەملەكەتتىك قىزمەتتەردى ەلەكتروندىق فورماتقا اۋىستىرۋ بارلىق كەدەرگى مەن تاۋەكەلدەردى جويۋعا اسەر ەتەتىنىن اتاپ ءوتتى.
سونىمەن قاتار اسحات ايماعامبەتوۆ ستۋدەنتتەرگە شاكىرتاقى تولەۋدىڭ جاڭا جۇيەسىن ازىرلەۋ تۋرالى ايتىپ بەردى. ەندىگى كەزەكتە ستۋدەنتتەر، ماگيسترانتتار مەن دوكتورانتتاردىڭ ستيپەنديالارى ولاردىڭ كارتا شوتتارىنا تىكەلەي تۇسەتىن بولادى دەپ جوسپارلانىپ وتىر. بۇعان دەيىن شاكىرتاقىنى ستۋدەنتتەردىڭ ۇلگەرىمىنە قاراپ، جوعارى وقۋ ورىندارىنىڭ وزدەرى اۋداراتىن ەدى. پيلوتتىق جوبانى ىسكە اسىرۋ باستالىپ كەتتى.