قۇرىلىس وبەكتىلەرىن ونلاين-فورماتتا مودەلدەۋگە بولادى.
قازاقستان ۇكىمەتى قۇرىلىس سەكتورىنا IT-شەشىمدەر ەنگىزۋدى كوزدەپ وتىر، دەپ حابارلايدى Almaty-akshamy.kz.
«اقپاراتتىق مودەلدەردىڭ مەملەكەتتىك بانكى قۇرىلىس نىسانىنداعى ۇردىستەردى باسقارۋ ءۇشىن ءبىرىڭعاي سيفرلىق الاڭعا اينالادى. اتاپ ايتقاندا، اتالعان جۇيە اقپاراتتىق مودەلدەۋ تەحنولوگيالارىن قولدانا وتىرىپ، قۇرىلىس وبەكتىلەرىن ونلاين-فورماتتا مودەلدەۋگە مۇمكىندىك بەرەدى»،- دەلىنگەن يندۋستريا جانە ينفراقۇرىمدىلىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
وسىلايشا، مەملەكەتتىك بانك پلاتفورماسىندا تاپسىرىس بەرۋشىلەر قۇرىلىس جوباسىنىڭ باسقا قاتىسۋشىلارىمەن ءوزارا بايلانىس ورناتا وتىرىپ، قۇرىلىسقا دايىندىق ءۇشىن قاجەت ساتىلاردان ونلاين رەجيمدە وتە الادى.
ايتا كەتەرلىگى، اقپاراتتىق مودەلدەر بانكىن «ە-قۇرىلىس» جانە «ە-شاڭىراق» پلاتفورمالارىمەن ينتەگراسيالاۋ جوسپارلانىپ وتىر. ەستەرىڭىزگە سالا كەتەيىك، «ە-قۇرىلىس» جۇيەسى قۇرىلىس پروسەستەرىن بارلىق كەزەڭدەردە ونلاين-رەجيمدە باقىلاۋعا مۇمكىندىك بەرەدى. ال، «ە-شاڭىراق» پلاتفورماسى تۇرعىن ءۇي قورىن باسقارۋدىڭ اشىقتىعىن قامتاماسىز ەتىپ، قۇرىلىس سالاسىندا مونيتورينگ پەن تالداۋ جاسايتىن سۋبەكتىلەردىڭ ءبىرىڭعاي جۇيەسى بولىپ تابىلادى.
كوزدەلىپ وتىرعان جاڭا IT-شەشىم قۇرىلىس جۇمىستارىن جوبالاۋ بارىسىندا ەلەكتروندىق قۇجات اينالىمىنا كوشۋگە مۇمكىندىك بەرەدى. سايكەسىنشە، جوبالىق-سمەتالىق قۇجاتتامانى ازىرلەۋ پروسەسىندە بارىنشا اشىقتىقتى قامتاماسىز ەتەدى.
بۇگىنگى تاڭدا مەملەكەتتىك بانك ساراپتامالىق قىزمەت ءۇشىن ينتەگراسيالىق سەرۆيستەر مەن جۇيەنىڭ جاڭا مودۋلدەرىن ازىرلەۋدىڭ بەلسەندى كەزەڭىندە. جوباعا قاتىسۋشىلار سالالىق بيزنەس-پروسەستەردى، سونىمەن بىرگە تەحنيكالىق تالاپتاردى دايىنداۋ ءۇشىن دەرەكتەردىڭ قۇرىلىمىن تالداۋ جۇمىستارىنا جۇمىلدىرىلعان.