الماتى قالاسىنىڭ المالى اۋداندىق سوتىندا 33 جاستاعى ەر ادامعا قاتىستى قىلمىستىق ءىس قارالدى.
ءىستى بولعان ادام 6 جىلعا سوتتالدى، دەپ حابارلايدى Almaty-akshamy.kz
قىلمىستىق ءىس قىلمىستىق كودەكستىڭ 291-بابىنىڭ 3-بولىگىنىڭ 4-تارماعى «قارۋدى، وق-دارىلەردi، جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ» بويىنشا قارالدى.
33 جاستاعى ي. ەسىمدى سوتتالۋشى تەرگەۋمەن انىقتالماعان اداممەن بىرگە توتەنشە جاعداي كەزىندە جۇمىس ىستەگەن قارۋ-جاراق دۇكەنىنە زاڭسىز كىرىپ، قۇنى 204 733 تەڭگە Beretta Perennia III ماركالى تەگىس ۇڭعىلى قارۋدىڭ 1 داناسىن، قۇنى 187 557 تەڭگە ATA ARMS ماركالى تەگىس ۇڭعىلى قارۋدىڭ 1 داناسىن ۇرلاعانى انىقتالدى.
سوتتا سوتتالۋشى ي. كىناسىن ءىشىنارا مويىندادى. ول قارۋ-جاراق دۇكەنىنە كىرمەگەنىن، دۇكەننىڭ جانىنان قارۋ تاۋىپ، ونى ارى قاراي قۇقىق قورعاۋ ورگاندارىنا تابىستاۋ ءۇشىن العانىن ايتتى. الايدا، سوتتالۋشىنىڭ كىناسى ونىڭ تانىستارى بولعان كۋاگەرلەردىڭ ايعاقتارىمەن راستالدى. ولار تەرگەۋ بارىسىندا سوتتالۋشى تەرگەۋمەن انىقتالماعان اداممەن بىرگە دۇكەنگە كىرىپ، كەيىن ۇرلانعان قارۋمەن كولىككە وتىرعانىن ايتتى.
پروكۋرور ايىپتاۋدى قولداپ، سوتتان 6 جىلعا باس بوستاندىعىنان ايىرۋ جازاسىن تاعايىنداۋدى سۇرادى. ەكى كامەلەتكە تولماعان بالاسىنىڭ بولۋى، كىناسىن ءىشىنارا مويىنداۋى جانە سوتتالۋشىنىڭ جاسى جازانى جەڭىلدەتكەنىمەن، توتەنشە جاعداي كەزىندە قىلمىس جاساۋى ونى قيىنداتتى.
«زاڭ بويىنشا اتالعان قىلمىس ءۇشىن 5 جىلدان 12 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان. سوت ۇكىمىمەن سوتتالۋشى ي الدىن الا ءسوز بايلاسۋ ارقىلى ادامدار توبىندا اتىس قارۋىن ۇرلاعانى ءۇشىن كىنالى دەپ تانىلىپ، قىلمىستىق-اتقارۋ جۇيەسى مەكەمەلەرىندە 6 جىل مەرزىمگە باس بوستاندىعىنان ايىرۋ جازاسى تاعايىندالدى. سوت ۇكىمى زاڭدى كۇشىنە ەنگەن جوق»، - دەپ حابارلادى المالى اۋداندىق سوتىنىڭ باسپا ءسوز قىزمەتى.