سونىمەن قاتار بىرنەشە بالانىڭ تۇساۋىن كەسىپ، اللادان ساۋىعىپ كەتۋىن تىلەپ، دۇعا جاسادى.
قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى قۇربان ايت مەرەكەسىنە وراي ەلوردادا ورنالاسقان «ونەگە» وڭالتۋ ورتالىعىندا بولىپ، قايىرىمدىلىق ءىس-شاراعا قاتىستى، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.
ورتالىق جەتەكشىسى گۇلىم قايىر قىزى باس مۇفتيگە سال اۋرۋىنا شالدىققان بالالاردى ەمدەۋ باعىتىنداعى جۇمىستارىمەن تانىستىردى. قمدب ءتوراعاسى ناۋرىزباي قاجى تاعان ۇلى قۇربان ايت مەرەكەسىنە وراي «ونەگە» وڭالتۋ ورتالىعىندا ەمدەلىپ جۇرگەن بالالارعا قيمىل-قوزعالىستى دۇرىستاۋعا، نىق قادام باسۋعا مۇمكىندىك بەرەتىن 2 دانا «گروسس ترەناجەرى» قۇرىلعىسىن سىيلاپ، ايتتىق ۇلەستىردى. سونىمەن قاتار بىرنەشە بالانىڭ تۇساۋىن كەسىپ، اللادان ساۋىعىپ كەتۋىن تىلەپ، دۇعا جاسادى.
«ادام بالاسى وسى ومىردە ءتۇرلى دەڭگەيدە سىناقتاردى باستان كەشەدى. اللا تاعالا وسى سىناقتى كوركەم سابىرمەن ەڭسەرۋگە كۇش-قۋات بەرسىن. مۇسىلمان بالاسى قۇدايدان ەشقاشان كۇدەر ۇزبەيدى. جاڭا كۇننەن جاقسىلىق كۇتىپ، ىزگىلىككە ۇمتىلادى. اللا قالاسا بۇل كۇندەر دە ارتتا قالىپ، قۋانىشتى ساتتەرىڭىز كوپ بولسىن»، - دەدى ناۋرىزباي قاجى تاعان ۇلى.
قايىرىمدىلىق ءىس-شاراسى مەرەكەلىك باعدارلاماعا ۇلاسىپ، بالالار ورتادا ءوز ونەرىن پاش ەتتى. ءوز كەزەگىندە «ونەگە» وڭالتۋ ورتالىعىنىڭ جەتەكشىسى گۇلىم قايىر قىزى مەن اتا-انالار ساۋاپتى ىسكە ۇيىتقى بولعان باس ءمۇفتي باستاعان «زەكەت جانە قايىرىمدىلىق» قورىنىڭ وكىلدەرىنە العىسىن ءبىلدىردى.
ايتا كەتسەك، بۇگىندە اتالعان ورتالىقتا 60 بالا ەمدەلۋدە.