كونسۋلدىق جۇمىسىنىڭ باسىم باعىتى – قازاقستان ازاماتتارىنىڭ قۇقىقتارى مەن زاڭدى مۇددەلەرىن قورعاۋ.
قازاقستاننىڭ يسپانياداعى ەلشىسى دانات مۇسايەۆتىڭ كانار ارالدارى اۆتونوميالىق قاۋىمداستىعىنا جۇمىس ساپارى بارىسىندا قۇرمەتتى كونسۋلدىقتىڭ سالتاناتتى اشىلۋ ءراسىمى ءوتتى، دەپ حابارلايدى Almaty-akshamy.kz قازاقستاننىڭ سىرتقى ىستەر مينيسترلىگىنە سىلتەمە جاساپ.
ساپار باسىندا قازاقستاندىق ديپلومات كانار ارالدارى ۇكىمەتىنىڭ ءتوراعاسى فەرناندو كلاۆيحومەن جانە يسپانيا ۇكىمەتىنىڭ كانار ارالدارىنداعى وكىلى ماريا تەرەزا مايانسپەن كەلىسسوزدەر جۇرگىزدى.
كەزدەسۋ بارىسىندا وڭىرلىك ىنتىماقتاستىقتىڭ وزەكتى ماسەلەلەرى تالقىلاندى.
سونداي-اق ساپار بارىسىندا قازاقستان ەلشىسى ساۋدا-ونەركاسىپ پالاتاسىمەن بىرلەسىپ ۇيىمداستىرىلعان "دوڭگەلەك ۇستەلگە" قاتىستى. ءىس-شارا اياسىندا ەلشى ىسكەر توپتار وكىلدەرىنىڭ نازارىن ەكى ەلدىڭ وڭىرلەرى اراسىنداعى ەكونوميكالىق ءوزارا ءىس-قيمىلدى دامىتۋدىڭ باسىمدىعىنا، سونداي-اق ەۋروپا مەن ازيا اراسىنداعى جۇكتەردى تاسىمالداۋ ءۇشىن ەلىمىزدىڭ ترانزيتتىك الەۋەتىن پايدالانۋعا اۋداردى.
ساپاردىڭ باستى ءىس-شاراسى كانار ارالدارىندا ق ر قۇرمەتتى كونسۋلدىعىنىڭ سالتاناتتى اشىلۋ ءراسىمى بولدى. قازاقستاننىڭ وڭىردەگى وكىلدىگىن اتلانتيكا ديرەكتيۆالىق ينستيتۋتىنىڭ حالىقارالىق ساۋدا جانە حالىقارالىق ەكونوميكا پروفەسسورى رافاەل حۋان مولينا پەتيت باسقاردى. ول بۇرىن كانار ارالدارىنىڭ ەكونوميكا مينيسترلىگى مەن ونەركاسىپ، ساۋدا جانە تۋريزم مينيسترلىگىندە باسشى لاۋازىمدارىندا قىزمەت اتقارعان.
قۇرمەتتى كونسۋلعا، ەڭ الدىمەن، ءوڭىر مەن قازاقستان اراسىنداعى ەكونوميكالىق جانە مادەني-گۋمانيتارلىق بايلانىستاردى نىعايتۋدا ماڭىزدى ءرول بەرىلەدى. بۇل رەتتە يسپانيا ازاماتتارى اسىراپ العان قازاقستاندىق بالالارمەن بايلانىستى قولداۋعا ەرەكشە نازار اۋدارىلادى.