نازىك جاندىلار حالىقتىڭ 51،2%-ىن قۇرايدى.
ولاردىڭ ناقتى سانى 10 183 785 بولعان، دەپ حابارلايدى Almaty-akshamy.kz
ۇلتتىق ستاتيستيكا بيۋروسىنىڭ 2023 جىلدىڭ 14 قاراشاسىنداعى مالىمەتى بويىنشا قازاقستان حالقىنىڭ سانى 20 ميلليون ادام بولدى.
"حالىقتىڭ دەرەكتەر بازاسىنىڭ كورسەتكىشتەرى بويىنشا 2023 جىلدىڭ 14 قاراشاسىندا تاڭعى ساعات 08.10-دا تۋعان 5 بالا ەلىمىزدىڭ 20 ميلليونىنشى حالقىن قۇرادى"، - دەپ ناقتىلادى ۆەدومستۆوداعىلار.
بۇل بەس نارەستە اتىراۋ، اقمولا، جەتىسۋ، تۇركىستان، ۇلىتاۋ وبلىستارىندا دۇنيەگە كەلدى. ولار - 3 ۇل جانە 2 قىز.
ستاتيستيكا ماماندارى تامىز ايىندا قازاقستان حالقىنىڭ 51،2%-ىن ايەلدەر قۇراعانىن مالىمدەدى – ولاردىڭ ناقتى سانى 10 183 785 بولعان. قالعان 48،8% نەمەسە 9 715 592 ازامات – ەر ادامدار.
ونەركاسىپ جانە قۇرىلىس مينيسترلىگىنىڭ مالىمەتى بويىنشا، قازاقستاندا بيزنەستەگى ايەلدەر شاعىن جانە ورتا بيزنەس سەكتورىنداعى جۇمىس ورىندارىنىڭ 31%-ىن جانە قازاقستاننىڭ ءجىو-نىڭ 14،6%-ىن قامتاماسىز ەتەدى.
"ازيا دامۋ بانكىنىڭ ەلدەردى باعالاۋى بويىنشا قازاقستان گەندەر جانە دامۋ سالاسىنداعى نەگىزگى كورسەتكىشتەر بويىنشا جوعارى ورىندا جانە ەرلەر مەن ايەلدەر اراسىنداعى تەڭدىك دەڭگەيى جوعارى 1ء-شى توپقا كىرەدى"، - دەيدى ۆەدومستۆوداعىلار.
بۇل رەتتە بانك قازاقستاندا ايەلدەردىڭ ەڭبەك نارىعىنداعى بەلسەندىلىگىنىڭ تۇراقتى دەڭگەيىن ساقتاپ وتىرعانىن مالىمدەدى.
"2022 جىلى "گەندەرلىك ايىرماشىلىق رەيتينگى" بويىنشا قازاقستان گەندەرلىك دامۋ سالاسىنداعى ءساتتى رەفورمالاردىڭ ارقاسىندا 15 ورىنعا جوعارى كوتەرىلىپ، 146 ەلدىڭ ىشىندە 65 ورىنعا يە بولدى"، - دەدى ونەركاسىپ جانە قۇرىلىس ۆيسە-مينيسترى دينارا ششەگلوۆا.
قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگى رەسپۋبليكادا 4،3 ميلليون ايەل جۇمىسپەن قامتىلعانىن، بۇل جالپى جۇمىسپەن قامتىلعان حالىقتىڭ 48%-ىن قۇرايتىنىن انىقتادى. ايەلدەردىڭ 35%-ى ساۋدا جانە قىزمەت كورسەتۋ سالالارىندا، 32%-ى ءبىلىم، دەنساۋلىق ساقتاۋ جانە عىلىم سالالارىندا، 14%-ى ونەركاسىپ، قۇرىلىس جانە كولىك سالالارىندا، 9%-دان استامى اۋىل شارۋاشىلىعىندا جۇمىس ىستەيدى.