الماتى وبلىسىنداعى رەسپۋبليكالىق وليمپيادالىق دايارلىق بازاسىندا قازاقستان ۇلتتىق قۇراماسىن XXXIII جازعى وليمپيا ويىندارىنا رەسمي شىعارىپ سالۋ ءراسىمى ءوتتى، دەپ حابارلايدى اlmaty-akshamy.kz.
ءتورتجىلدىقتىڭ باستى دوداسى 26 شىلدە مەن 11 تامىز ارالىعىندا پاريج قالاسىندا وتەدى. فرانسيا استاناسىندا قازاقستان قۇراماسى ساپىنان 80 سپورتشى سپورتتىڭ 25 تۇرىنەن ب ا ق سىناپ، 81 مەدال جيىنتىعىنا تالاسادى. ايتا كەتۋ كەرەك، قازاقستان تاۋەلسىزدىك جىلدارىنان بەرى وسىمەن سەگىزىنشى مارتە جازعى وليمپياداعا قاتىسپاق. رەسمي ءىس-شارادا ەرمەك مارجىقپايەۆ سپورتشىلار جانە جاتتىقتىرۋشىلار قۇرامىمەن اڭگىمەلەسىپ، الداعى جارىستارعا ساتتىلىك تىلەدى. مينيستر بۇل وقيعانىڭ ەلىمىز ءۇشىن ەرەكشە ماڭىزعا يە ەكەنىن اتاپ ءوتتى.
«سىزدەردىڭ الدىڭىزدا ەلىمىزدى پاريج وليمپياداسىندا تانىستىرۋ، ەل نامىسىن ابىرويمەن قورعاۋ سياقتى ماڭىزدى ءارى وتە جاۋاپتى مىندەت تۇر. سىزدەردىڭ چەمپيوندىق مىنەزىڭىز، تاباندىلىعىڭىز، جەڭىسكە دەگەن ەرىك-جىگەرىڭىز، وسى كۇنگە دەيىن جيعان تاجىريبەلەرىڭىز، جاتتىقتىرۋشىلاردىڭ، دارىگەرلەردىڭ، ماسساج جاساۋشىلاردىڭ قاجىرلى ەڭبەگىنىڭ ارقاسىندا ۇلكەن ناتيجەگە جەتەتىنىمىزگە سەنىمدىمىن. تاۋەلسىزدىك جىلدارىندا قازاقستان جازعى جانە قىسقى وليمپيا ويىندارىنىڭ 79 جۇلدەگەرىن، ونىڭ ىشىندە 15 وليمپيادا چەمپيونىن تاربيەلەپ شىعاردى. وليمپياداداعى جەتىستىكتەر – بۇكىل ەلدىڭ الەمدەگى ءيميدجى، مەملەكەتتىڭ ءال-اۋقاتىنىڭ كورسەتكىشى، ەڭ باستىسى، بۇل – سىزدەردىڭ كوپجىلدىق جانە قاجىرلى ەڭبەكتەرىڭىزدىڭ ناتيجەسى!»، - دەدى ەرمەك مارجىقپايەۆ.
ايتا كەتەيىك، قازاقستان قۇراماسىنىڭ سپورتشىلارى بيىل العاش رەت وليمپيادا باعدارلاماسىنا ەنگەن برەيكينگ جانە بادمينتون سياقتى سپورت تۇرلەرىنەن ونەر كورسەتەدى. برەيكينگتەن ەل نامىسىن ءامىر زاكيروۆ قورعاسا، بادمينتون سايىسىندا دميتريي پانارين ب ا ق سىنايدى. وليمپيا ويىندارىنىڭ اشىلۋ سالتاناتى 26 شىلدەدە پاريجدەگى سەنا وزەنىندە وتەدى. جارىسقا 205 ەلدەن 10 مىڭنان استام سپورتشى قاتىسادى. ولار 32 سپورت تۇرىنەن 329 مەدال جيىنتىعىن ساراپقا سالادى.