الماتى اكىمدىگى تۇرعىن ۇيلەردىڭ اۋلالارىنان ءىرى كولەمدى قوقىستى كىم شىعارۋى كەرەك ەكەنىن ءتۇسىندىردى، دەپ حابارلايدى almaty-akshamy.kz
الماتىدا بۇگىنگى تاڭدا كونتەينەرلىك الاڭداردىڭ ىرگەلەس اۋماقتارىندا ءىرى كولەمدى قوقىستاردى جيناۋ وزەكتى ماسەلە بولىپ وتىر. تۇرعىندار ەسكى جيھازدى، ىستەن شىققان تۇرمىستىق تەحنيكانى، سانتەحنيكالىق بۇيىمداردى جانە ت.ب. قالدىرىپ كەتەدى. سونىمەن قاتار، جوندەۋ جۇمىستارىنان كەيىن قۇرىلىس قالدىقتارى، مىسالى، پليتكالار، ەسكى ەسىك جاقتاۋلارى مەن كەنەپتەر، كىرپىشتەر دە قوقىس جاشىكتەرىنىڭ جانىندا قالدىرىلادى. بۇل الاڭنىڭ بىتەلۋىنە جانە باسقا تۇرمىستىق قالدىقتاردىڭ جينالۋىنا اكەلەدى.
قوقىس جينايتىن ماشينالار ۇلكەن كولەمدەگى قوقىستار مەن قۇرىلىس قالدىقتارىن شىعارا المايدى، ويتكەنى بۇل تەحنيكانىڭ پرەستەۋ اپپاراتىن ىستەن شىعارۋى مۇمكىن.
ەستەرىڭىزگە سالا كەتەيىك، «كوممۋنالدىق قالدىقتاردى باسقارۋ ەرەجەلەرىنە» سايكەس جىلجىمايتىن وبەكتىلەردى سالۋدى جانە (نەمەسە) جوندەۋدى جۇزەگە اسىراتىن جەكە جانە زاڭدى تۇلعالار قۇرىلىس جانە ءىرى كولەمدى قالدىقتاردى (جيھاز، تۇرمىستىق تەحنيكا) ارنايى بولىنگەن ورىندارعا ءوز بەتىنشە اكەتۋى قاجەت.
«الماتى قالاسىنىڭ اۋماعىن اباتتاندىرۋ ەرەجەلەرىنە» سايكەس ءىرى كولەمدى قوقىستاردى (قالدىقتاردى) شىعارۋدى ءىرى كولەمدى قوقىستاردى اكەتۋ شارتى نەگىزىندە كاسىپورىنداردىڭ، مەكەمەلەردىڭ جانە جەكە تۇلعالاردىڭ وزدەرى نەمەسە قوقىس شىعاراتىن كاسىپورىندار جۇرگىزەدى.
ۇيدە جوندەۋ جۇمىستارىن جۇرگىزەتىن تۇرعىندار، سونداي-اق ءىرى كولەمدى قوقىستار پايدا بولعان كەزدە مامانداندىرىلعان ۇيىمدارعا حابارلاسىپ، اقىلى تەحنيكانى شاقىرۋى نەمەسە قالدىقتاردى پوليگونعا ءوز بەتىنشە شىعارۋى قاجەت. پوليگوندار الماتى وبلىسىندا، ىلە اۋدانىندا جانە قاراساي اۋدانىندا ايتەي اۋىلىندا ورنالاسقان.
«اكىمشىلىك قۇقىق بۇزۋشىلىق تۋرالى» ق ر كودەكسىنىڭ 505-بابىنا سايكەس اباتتاندىرۋ قاعيدالارىن بۇزۋ جەكە تۇلعالارعا – جيىرما اەك، شاعىن كاسىپكەرلىك سۋبەكتىلەرىنە نەمەسە كوممەرسيالىق ەمەس ۇيىمدارعا – وتىز اەك، ورتا كاسىپكەرلىك سۋبەكتىلەرىنە – قىرىق اەك، ءىرى كاسىپكەرلىك سۋبەكتىلەرىنە – ەلۋ اەك مولشەرىندە ەسكەرتۋ جاساۋعا نەمەسە ايىپپۇل سالۋعا اكەپ سوعادى.
الماتى پد اقپاراتى بويىنشا، وسى باپقا قاتىستى قالانى اباتتاندىرۋ ەرەجەلەرىن بۇزعانى، ينفراقۇرىلىم وبەكتىلەرىن جانە جاسىل جەلەكتەردى قيراتقانى ءارى بۇلدىرگەنى ءۇشىن 2024 جىلدىڭ 6 ايىندا 11 577 بۇزۋشىلىق تىركەلدى، 32 749 200 تەڭگەگە ايىپپۇل سالىندى.
الماتى اكىمدىگى تۇرعىن ۇيلەردىڭ اۋلالارىنان ءىرى كولەمدى قوقىستاردى شىعارۋ ماسەلەسىن رەتتەۋ ءۇشىن تۇرعىندارعا جانە كاسىپكەرلەرگە ارنايى ەرەجەلەردى ۇستانۋدى ۇسىنادى. قۇرىلىس قالدىقتارى مەن ەسكى جيھازداردى زاڭعا سايكەس ارنايى بولىنگەن ورىندارعا ءوز بەتىنشە اكەتۋ قاجەتتىگىن ەسكەرتەدى.