ىرىكتەۋ ءتۋرنيرىن استانادا باستاعان قازاقستان فۋتزال قۇراماسى العاشقى كەزدەسۋدە جەڭىسكە جەتتى
ەلورداداعى "جەكپە جەك" سپورت كەشەنىندە قازاقستان مەن سلوۆەنيا قۇرامالارى اراسىندا رەسمي ماچ وينالدى، دەپ حابارلايدى Almaty-akshamy.kz inbusiness.kz-كە سىلتەمە جاساپ.
ەۋروپا چەمپيوناتىنىڭ ىرىكتەۋ ءتۋرنيرى اياسىندا كەزدەسكەن قوس قۇراما جانكۇيەرلەر كوڭىلىنەن شىعاتىن ويىن كورسەتتى. 2024 جىلى بولاتىن ەۋروپا چەمپيوناتىنا بارۋ ءۇشىن قازاقستان قۇراماسى الدىمەن ءوز توبىندا جەڭىسكە جەتۋى قاجەت. توپتا ەكى كوماندا. ونىڭ ءبىرى سلوۆەنيا، ەكىنشىسى چەرنوگوريا قۇراماسى.
سلوۆەنيا وسال قارسىلاس ەمەس. ولار الەم چەمپيوناتىندا ونەر كورسەتكەن. ءدال ءبىزدىڭ توبىمىزدا ويناپ، قازاقستان قۇراماسىنا سول شاقتا تەگەۋرىندى قارسىلىق كورسەتتى. بۇل جولى دا سولاي بولدى. دەسە دە، ويىننىڭ باستاپقى بولىگىندە جىلدام سالىنعان گول قازاقستان قۇراماسىنا تاماشا كوڭىل-كۇي سىيلادى. 6 مينۋتتا البەرت اقبالىقوۆ ەسەپ اشىپ، كوماندامىزدى جەڭىسكە جەتەلەدى. ودان كەيىن قوناقتار دا بىرنەشە مۇمكىندىكتەر جاساپ، قورعانىسىمىزدىڭ دەگبىرىن قاشىردى. ال كەزدەسۋدىڭ 35 مينۋتىندا دۋگلاس ەسەپتى ەسەلەپ، جەڭىمپاز جايلى ساۋالعا نۇكتە قويدى. قازاقستان قۇراماسى وسى ەسەپتى ۇستاپ قالدى.
قورجىنىمىزدا ەندى 3 ۇپاي. كەلەسى ويىندى قازاقستان قۇراماسى 12 قازان كۇنى چەرنوگوريادا وتكىزەدى. ول ماچتا دا كاكا شاكىرتتەرىنە جەڭىس قاجەت.