قازاقستاندا قازاننىڭ ەكىنشى جەكسەنبىسى مۇگەدەكتىگى بار ادامدار كۇنى اتالىپ وتەدى
ەلىمىزدە ەرەكشە قاجەتتىلىگى بار 705 مىڭنان استام ازاماتتىڭ 534 مىڭنان استامى الەۋمەتتىك جاردەماقى الادى. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگىنەن ءمالىم ەتتى، دەپ حابارلايدى Almaty-akshamy.kz.
بۇگىنگى تاڭدا ەلىمىزدە تۇراتىن مۇگەدەكتىگى بار 705 مىڭ ادامنىڭ:
- 421،5 مىڭى ەڭبەككە قابىلەتتى جاستا (59،8%)؛
- 181،9 مىڭى زەينەتكەرلىك جاستا (25،8%)؛
- 101،6 مىڭى 18 جاسقا دەيىنگى بالالار (14،4%).
2022 جىلعى 1 قازانداعى جاعداي بويىنشا 534،6 مىڭ ادام مەملەكەتتىك الەۋمەتتىك جاردەماقى (ءماج) الادى. بيىلعى قاڭتار-قىركۇيەك ايلارى ارالىعىندا رەسپۋبليكالىق بيۋدجەتتەن مۇگەدەكتىگى بويىنشا ءماج تولەۋگە 254،5 ملرد تەڭگە باعىتتالعان.
ايتا كەتەيىك، مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا جانە سەبەبىنە، سونداي-اق ءتيىستى قارجى جىلىنا ارنالعان "رەسپۋبليكالىق بيۋدجەت تۋرالى" زاڭدا بەلگىلەنگەن ەڭ تومەنگى كۇنكورىس دەڭگەيىنىڭ شاماسىنا بايلانىستى بولادى. 2022 جىلدىڭ 1 قازانىندا مۇگەدەكتىگى بويىنشا ءماج-دىڭ ورتاشا مولشەرى 53 802 تەڭگەنى قۇرادى.
وسى جىلى قابىلدانعان "قازاقستان رەسپۋبليكاسىنىڭ كەيبىر زاڭنامالىق اكتىلەرىنە مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ 76 زاڭنامالىق اكتىگە وزگەرىستەر ەنگىزۋدى كوزدەيتىنى ەرەكشە ماڭىزعا يە.
قۇجاتتا كوزدەلەدى:
- دەنساۋلىق ساقتاۋ ۇيىمدارىندا مۇگەدەكتىگى بار ادامدارعا ءبىرىنشى كەزەكتە قىزمەت كورسەتۋ قۇقىعىن ايقىنداۋ؛
- مۇگەدەكتىگى بار بالانى ساناتورلىق-كۋرورتتىق ەمدەۋگە الىپ جۇرەتىن زاڭدى وكىلدەردىڭ بىرىنە ساناتورييدە بولۋ قۇنىن ساناتورلىق-كۋرورتتىق ەمدەۋ قۇنىن وتەۋ رەتىندە بەرىلەتىن كەپىلدىك بەرىلگەن سومانىڭ 70% مولشەرىندە وتەۋ تۇرىندەگى وزگەرىس؛
- پسيحولوگيالىق-مەديسينالىق-پەداگوگيكالىق كونسۋلتاسيالاردى اشۋ جونىندەگى نورماتيۆتەردى 60 مىڭنان 50 مىڭ بالاعا دەيىن تومەندەتۋ؛
- "ابيليتاسيا" ۇعىمىن ەنگىزۋ (مۇگەدەكتىگى بار ادامداردىڭ تۇرمىستىق، قوعامدىق جانە كاسىبي قىزمەتكە قابىلەتتەرىن قالىپتاستىرۋعا جانە دامىتۋعا باعىتتالعان شارالار كەشەنى)؛
- قۇقىقتىق جانە تەحنيكالىق سيپاتتاعى نوتارياتتىق ىس-ارەكەتتەر جاساۋ كەزىندە جەكە نوتاريۋستاردىڭ قىزمەتتەرىنە اقى تولەۋدەن بوساتىلعان ادامدار ساناتىنا ءۇشىنشى توپتاعى مۇگەدەكتىگى بار ادامداردى قوسۋ؛
- مۇگەدەكتىگى بار ادامداردىڭ مۇددەلەرىن ساقتاي وتىرىپ، ينتەرنەت-رەسۋرستار قۇرۋ جانە اقپاراتتى ەلەكتروندىق ۇكىمەت ۆەب-پورتالىنىڭ كومپونەنتتەرىنە ورنالاستىرۋ.
مەملەكەت باسشىسى ءوز جولداۋىندا ەرەكشە قاجەتتىلىكتەرى بار ادامداردىڭ ءومىر ءسۇرۋ ساپاسىن جاقسارتۋ مىندەتىن قويدى، اتاپ ايتقاندا، بۇل – وڭالتۋ ورتالىقتارىنىڭ جەلىسىن كەڭەيتۋ.
12 وڭىردە 150 ورىندىق جاڭا وڭالتۋ ورتالىقتارىنىڭ قۇرىلىسى جوسپارلانعان. 2021 جىلى وڭالتۋ ورتالىقتارىنىڭ قۇرىلىسى 3 وڭىردە باستالدى: اباي، جامبىل جانە تۇركىستان وبلىستارى. بيىلعى جىلى اقتوبە جانە باتىس قازاقستان وبلىستارىندا قۇرىلىس باستالدى، 2023 جىلى اقمولا وبلىسىندا باستاۋ جوسپارلانۋدا.
بۇدان باسقا، 2022 جىلى اۋتيزم سپەكترى بۇزىلعان جانە باسقا دا اقىل-ويى تەجەلگەن بالالارعا ارنالعان (اقتوبە، جەتىسۋ، جامبىل، شىعىس قازاقستان، قوستاناي، پاۆلودار وبلىستارىندا، شىمكەنت جانە الماتى قالالارىندا) 8 كۇندىزگى كۇتىم ورتالىعىن اشۋ جوسپارلانعان.