قىرىم كوپىرىندەگى جارىلىستان قازا تاپقاندار سانى ايتىلدى

قازا تاپقاندار جارىلعان جۇك كولىگىنىڭ قاسىندا كەلە جاتقان جەڭىل كولىكتە بولعان

الدىن الا مالىمەت بويىنشا، قىرىم كوپىرىندەگى جارىلىس سالدارىنان ءۇش ادام قازا تاپتى. بۇل اقپاراتتى رەسەيدىڭ تەرگەۋ كوميتەتى جاريا ەتتى، دەپ حابارلايدى Almaty-akshamy.kz Tengrinews.kz-كە سىلتەمە جاساپ.

قازا تاپقاندار جارىلعان جۇك كولىگىنىڭ قاسىندا كەلە جاتقان جەڭىل كولىكتە بولعان.

"قازىرگى ۋاقىتتا قازا تاپقان ەكى ادامنىڭ - ەر مەن ايەلدىڭ دەنەسى سۋدان شىعارىلدى، ولاردىڭ جەكە باسى انىقتالىپ جاتىر"، - دەدى ۆەدومستۆو وكىلدەرى.

8 قازاندا تاڭەرتەڭ قىرىم كوپىرىندە جارىلىس بولعان. رەسەي ۇكىمەتى پرەزيدەنت ۆلاديمير ءپۋتيننىڭ تاپسىرماسىمەن تەرگەۋ كوميسسياسىن قۇردى، قالپىنا كەلتىرۋ جۇمىستارى باستالدى.

"يزۆەستيا" مالىمەتىنشە، سول كۇنى كەشكە قىرىم كوپىرىندە اۆتوكولىكتەر مەن اۆتوبۋستارعا قوزعالىس اشىلدى، ءبىراق تولىق تەكسەرۋ پروسەدۋراسىنان ءوتۋى كەرەگى ايتىلعان. رەسەي پرەمەر-مينيسترىنىڭ ورىنباسارى مارات حۋسنۋللين 9 قازاننان باستاپ قىرىم كوپىرىندە كولىك قوزعالىسىن ەكى جولاقتا جۇرگىزۋ تۋرالى تاپسىرما بەرىلگەنىن ايتقان.