بۇل - ۇكىمەت باسشىسىنىڭ ءسوزى.
دوحادا ءوتىپ جاتقان ءۇشىنشى قاتار ەكونوميكالىق فورۋمى اياسىندا ق ر پرەمەر-مينيسترى ءاليحان سمايىلوۆ پەن قاتار ءامىرى شەيح ءتاميم بين حاماد ءال ءتاني كەزدەسۋ وتكىزدى، دەپ حابارلايدى Almaty-akshamy.kz
ءاليحان سمايىلوۆ قاتار امىرىنە مەملەكەت باسشىسى قاسىم-جومارت توقايەۆتىڭ ىستىق سالەمى مەن ىزگى تىلەگىن جەتكىزىپ، دۇنيەجۇزى قوعامداستىعىنىڭ نازارىن اۋدارعان فۋتبولدان الەم چەمپيوناتىنىڭ ءساتتى وتۋىمەن قۇتتىقتادى.
پرەمەر-مينيستر قاتار قازاقستاننىڭ اراب الەمىندەگى ماڭىزدى ساياسي جانە ەكونوميكالىق سەرىكتەسى ەكەنىن اتاپ ءوتتى. مۇنىڭ دالەلى ءوزارا ساۋدا مەن ينۆەستيسيالار سالاسىنداعى جوعارى كورسەتكىشتەر بولىپ تابىلادى. ماسەلەن، وسى جىلدىڭ ءبىرىنشى توقسانىندا عانا ەكىجاقتى تاۋار اينالىمىنىڭ كولەمى 17،7 ەسە وسسە، 2022 جىلدىڭ قورىتىندىسى بويىنشا رەسپۋبليكاعا قۇيىلعان قاتار ينۆەستيسيالارىنىڭ كولەمى 3 ەسە ارتقان.
«بۇل رەتتە ءبىز ءوزارا ساۋدا كولەمىن ودان ءارى ۇلعايتۋ بويىنشا بۇدان دا جوعارى الەۋەتتىڭ بارىن كورىپ وتىرمىز. وسىعان بايلانىستى قاتارعا 60 تاۋار پوزيسياسى بويىنشا قازاقستاندىق ءونىمنىڭ ەكسپورتىن شامامەن $243 ملن-عا ۇلعايتۋدى ۇسىندىق. سونىمەن قاتار ءبىز ينۆەستيسيالىق ارىپتەستىكتى ودان ءارى كەڭەيتۋگە مۇددەلىمىز»، — دەدى ءاليحان سمايىلوۆ.
وسى تۇرعىدا ۇكىمەت باسشىسى Qatar Investment Authority مەن «سامۇرىق-قازىنا» مەملەكەتتىك قورلارى اراسىنداعى ىنتىماقتاستىقتىڭ جانە بىرلەسكەن تىكەلەي ينۆەستيسيالار قورىن قۇرۋ جوسپارلارىنىڭ ماڭىزدىلىعىن اتاپ ءوتتى.
ءوز تاراپىنان شەيح ءتاميم بين حاماد ءال ءتاني باسىم باعىتتاردىڭ بارلىعى بويىنشا ەكىجاقتى ءوزارا ءىس-قيمىلدى نىعايتۋعا دايىن ەكەنىن راستادى.