تانىمال فۋتبولشى كريشتيانۋ رونالدۋ "ءال-شاباب" كومانداسى قاقپاسىنا سوققان گولىنا وزگەشە ارەكەت جاسادى.
فۋتبول سۇيەر قاۋىم، اسىرەسە، رونالدۋدىڭ جانكۇيەرلەرى ونىڭ گول سوققاننان كەيىن جۇگىرىپ كەلىپ "Si-i-i-u-u-u!" دەپ ايقايلاپ كەرى بۇرىلاتىن ادەتى بارىن جاقسى بىلەدى. بۇل جولى اتاقتى اياقدوپ شەبەرى كەزەكتى گولىنان كەيىن باسىن ساجدەگە قويدى، دەپ حابارلايدى Almaty-akshamy.kz.
Astanatv.kzء-تىڭ حابارلاۋىنشا، ويىندا "ءال-ناسر" كومانداسى 0:2 ەسەبىمەن جەڭىلىپ تۇرىپ، كامبەك جاسادى. 59-مينۋتتا رونالدۋ سوققان گول كومانداسىنا جەڭىس سىيلادى. پورتۋگالدىق فۋتبولشىنىڭ الىستان قيا تەپكەن دوبىن قوناقتار قاقپاشىسى قايتارا العان جوق.
رونالدۋدىڭ گول سوققاننان كەيىنگى ەرەكشە تويلاۋى جانكۇيەرلەردى راسىمەن تاڭعالدىردى. ساجدەنى مۇسىلماندار ناماز وقىعاندا، قۇران باعىشتاپ، اللاعا قۇلشىلىق ەتكەندە جاسايدى. ال فۋتبولشىنىڭ بۇل جاساعانى ءوزى تۇرىپ جاتقان ەلدىڭ (ساۋد ارابياسى) مادەنيەتى مەن مۇسىلمان جۇرتشىلىعىنا قۇرمەتى ىسپەتتى.
ايتا كەتەيىك، وسىعان دەيىن كريشتيانۋ رونالدۋ "ءال ناسر" كومانداسىمەن كەلىسىمشارتىن بۇزىپ، ەۋروپا كلۋبتارىنىڭ بىرىنە اۋىسقىسى كەلەتىنى جايلى اقپارات تاراعان بولاتىن.