جاۋىنگەرلىك جولىن جاڭادان باستاعان كىشى كومانديرلەردىڭ كوڭىل-كۇيلەرى جاقسى.
قارۋلى كۇشتەردىڭ قۇرامالارى مەن بولىمدەرىنە شوقان ءۋاليحانوۆ اتىنداعى قورعانىس مينيسترلىگى اسكەري كوللەدجىنىڭ تۇلەكتەرى قىزمەت وتكەرۋ ءۇشىن كەلۋدە، دەپ حابارلايدى Almaty-akshamy.kz.
«جوعارى ءبىلىمدى، اسكەري ءىستىڭ تەورياسى مەن پراكتيكاسىن جەتىك مەڭگەرگەن كاسىپقوي سەرجانتتار جەكە قۇرامدى وقىتۋ مەن تاربيەلەۋدىڭ قىر-سىرىن مەڭگەرۋگە كىرىسىپ كەتتى. ولار كۇن تارتىبىنە سايكەس، ءوز بولىمشەلەرىنىڭ قاسىندا بولىپ، ساپتىق دايارلىقپەن اينالىسادى»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
باعىنىستىلاردى قارۋدى مەڭگەرۋ داعدىلارىنا ۇيرەتەدى. جاۋىنگەرلىك اتىستاردى ورىندايدى جانە مارش جاسايدى. باستى ماقسات بويلارىنداعى كومانديرگە ءتان قاسيەتتەردى كورسەتۋ، باعىنىستىلار اراسىندا بەدەلدى بولۋ جانە جەكە قۇرامنىڭ قاجەتتىلىكتەرىن ءتۇسىنۋ ءبىلۋ.
«ون ءبىرىنشى سىنىپتى بىتىرگەننەن كەيىن اسكەري جەتەكشىنىڭ ۇسىنىسىمەن اسكەري كوللەدجگە وقۋعا ءتۇستىم. ەندى، مىنە، قونايەۆ گارنيزونىنداعى دەسانتتىق-شابۋىلداۋ قۇراماسىنا قىزمەتىمدى وتكەرۋگە كەلىپ وتىرمىن. مۇندا ءبىزدى وتە جىلى قارسى الدى، تۇرمىستىق ماسەلەلەردى تەز ارادا شەشۋگە كومەكتەستى»، – دەيدى بولىمشە كومانديرى گۆارديا كىشى سەرجانتى البەرت گورر.
جاس سەرجانتتاردى اسكەري قىزمەت جاعدايلارىنا تەز ارادا بەيىمدەۋ، لاۋازىمدا قالىپتاسۋى ماقساتىندا الداعى ۋاقىتتا ولارعا وقۋ-ادىستەمەلىك جيىندار وتكىزىلەتىن بولادى. ساباق بارىسىندا كىشى كومانديرلەر اسكەري بولىمدەگى قىزمەتتى ۇيىمداستىرۋدىڭ نەگىزگى پرينسيپتەرىمەن ەگجەي-تەگجەيلى تانىسادى.
جاۋىنگەرلىك جولىن جاڭادان باستاعان كىشى كومانديرلەردىڭ كوڭىل-كۇيلەرى جاقسى. ولار اسكەري كوللەدجدە تارتىپكە، شىدامدىلىققا ۇيرەنگەنىن، وقىتۋشىلار مەن كومانديرلەرىنەن قاجەتتى ءبىلىم العانىن اتاپ ءوتتى.
بۇگىندە شوقان ءۋاليحانوۆ اتىنداعى قورعانىس مينيسترلىگىنىڭ اسكەري كوللەدجى كاسىبي سەرجانتتاردى دايارلاۋدىڭ نەگىزگى ورتالىعى بولىپ تابىلادى. كوللەدج تۇلەكتەرى قارۋلى كۇشتەر مەن باسقا دا كۇشتىك قۇرىلىمداردىڭ قاتارىندا تابىستى قىزمەت ەتۋدە.