الماتىلىقتىڭ موپەدىن كۇشتەپ تارتىپ العان ادام ۇستالدى

ول بۇرىن سوتتى بولعان 38 جاستاعى ب.ەسىمدى ازامات.

كۇدىكتى ۋاقىتشا ۇستاۋ يزولياتورىنا قامالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

جەتىسۋ اۋداندىق پوليسيا باسقارماسىنىڭ مالىمەتىنشە، پوليسەيلەر 19 جاستاعى ءجاسوسپىرىمنىڭ موپەدىن كۇشپەن تارتىپ العان قىلمىسكەردى قۋۋعا ءماجبۇر بولعان.

«دالىرەك ايتساق، قاسكوي موپەدتىڭ كىلتىن تالاپ ەتىپ، جاس جىگىتتى تۇنشىقتىرا باستاعان. وقيعا كەشكى ساعات بەستەر شاماسىندا سولتۇستىك اينالما مەن گەولوگتار كوشەلەرىنىڭ قيىلىسىندا ورىن الدى. تونالعان جاس جىگىت وقيعا تۋرالى دەرەۋ پوليسياعا حابار بەردى. ءبىرىنشى بولىپ «بۋران-161» پاترۋلدىك پوليسياسىنىڭ ەكيپاجى مەن جەدەل-تەرگەۋ توبى ارەكەت ەتتى. ولار قاسكۇنەمدى قۋا باستادى. ءىزىن سۋىتپاي  بۇرىن سوتتى بولعان 38 جاستاعى ب.ەسىمدى ازامات ۇستالدى. ول ءوزىنىڭ ۇيىندە قولعا ءتۇستى. ەكى دوڭگەلەكتى كولىك تاركىلەنىپ، پروسەسسۋالدىق تارتىپتە يەسىنە قايتارىلدى، – دەدى جەتىسۋ اۋداندىق پوليسيا باسقارماسىنىڭ باستىعى دارحان مۇسانوۆ.

بۇل دەرەك سوتقا دەيىنگى تەرگەۋدىڭ ءبىرىڭعاي تىزىلىمىنە ق ر قك-نىڭ 191-بابى 2-بولىگىنىڭ 1-تارماعى بويىنشا تىركەلدى. كۇدىكتى ۋاقىتشا ۇستاۋ يزولياتورىنا قامالدى.