قازاقستاندىق بىتىمگەرلەر بۇۇ-نىڭ ليۆانداعى ميسسياسىنىڭ «شىعىس» سەكتورىندا ورنالاستى
«بۇۇ-نىڭ ليۆانداعى ۋاقىتشا كۇشتەرى» ميسسياسىنا قاتىساتىن ءۇندىستان قارۋلى كۇشتەرىنىڭ بىتىمگەرلىك كونتينگەنتى قۇرامىندا قازاقستاندىق بىتىمگەرلەردىڭ كەزەكتى روتاسياسى جۇرگىزىلدى، دەپ حابارلايدى Almaty-akshamy.kz.
الماتى حالىقارالىق اۋەجايىندا تاياۋ شىعىس ەلىندەگى ميسسيانى اياقتاعان اسكەري قىزمەتشىلەردى سالتاناتتى قارسى الۋ ءراسىمى ءوتتى.
قازاقستاندىق بىتىمگەرلەر بۇۇ-نىڭ ليۆانداعى ميسسياسىنىڭ «شىعىس» سەكتورىندا ورنالاستى. ولار بۇۇ مانداتى اياسىندا جاياۋ جانە ءموبيلدى پاترۋلدەۋدى جۇزەگە اسىردى. جول توسقاۋىلدارىنىڭ جۇمىسىن ۇيىمداستىرۋمەن اينالىستى. ءۇندى كونتينگەنتىمەن بىرگە باسقا دا مىندەتتەردى ورىندادى.
– ليۆاندا ءبىز ءۇندى باتالونىنىڭ قۇرامىندا بولدىق. قازاقستاننىڭ حالىقارالىق ارەناداعى بەدەلىن نىعايتۋ ءۇشىن ءبارىن جاسادىق. شىعىس سەكتورىنىڭ قولباسشىسى مەن باتالون قولباسشىلىعى ءبىزدىڭ اسكەري قىزمەتشىلەردىڭ قىزمەتى مەن جاۋىنگەرلىك دايارلىق دەڭگەيىن جوعارى باعالادى، – دەپ اتاپ ءوتتى بىتىمگەرلىك توبىنىڭ كومانديرى اعا لەيتەنانت تەمىرلان كۇمىسبەكوۆ.
جاقىن ارادا بىتىمگەرلەر ساناتورلىق-كۋرورتتىق ەمدەلۋدەن ءوتۋى ءتيىس. سودان كەيىن ولار تۇراقتى ورنالاسقان جەرى بويىنشا قىزمەت اتقارۋعا كىرىسەدى.
بۇگىنگە دەيىن ءۇندىستان بىتىمگەرلىك كونتينگەنتىنىڭ قۇرامىندا 500-دەن استام قازاقستاندىق اسكەري قىزمەتشى ليۆانداعى ميسسيانى ورىنداۋعا قاتىسقانىن اتاپ ءوتۋ كەرەك.