وتكەن جىلى قازاقستان 28 ملرد اقش دوللارى بولاتىن شەتەلدىك تىكەلەي ينۆەستيسيالاردى يەلەندى
الماتىدا ەۋرازيالىق دامۋ بانكىنىڭ (ەادب) ۇيىماستىرۋىمەن ازيا-تىنىق مۇحيت اۋماعى دامۋ ينستيتۋتتارى قاۋىمداستىعىنىڭ (ADFIAP) 46-شى جىلدىق جينالىسى شەڭبەرىندە 40-تان استام ەل ينۆەستورلارىنىڭ قاتىسۋىمەن اۋقىمدى حالىقارالىق فورۋم ءوتىپ جاتىر، دەپ حابارلايدى Almaty-akshamy.kz.
فورۋمعا 240 ءىرى بانك وكىلدەرى، ينۆەستيسيالىق قورلار مەن دامۋ ينستيتۋتتارى، اتاپ ايتقاندا جۇڭگو، تۇركيا، جاپون، ءۇندىستان، فيليپپين، جاڭا زەلانديا، ەۋروپا ەلدەرى، اقش، لاتىن امەريكا، تاياۋ شىعىس جانە ەۋروپا وداعىنىڭ مەملەكەتتەرىنەن وكىلدەر قاتىسىپ جاتىر.
پرەمەر-مينيستردىڭ ورىنباسارى - قارجى ءمينيسترى جانە قازاقستان رەسپۋبليكاسىنىڭ ەادب كەڭەسىندەگى وكىلەتتى وكىلىنىڭ ورىنباسارى ەرۇلان جاماۋبايەۆ ADFIAP 46-شى جىلدىق جينالىسىنىڭ قاتىسۋشىلارىنا پرەزيدەنت قاسىم-جومارت توقايەۆتىڭ ءالعىسوزىن وقىپ بەردى.
«قازاقستان قارقىندى تۇردە ءوزارا ءتيىمدى ەكونوميكالىق، ينۆەستيسيالىق، ساۋدا باعىتتارىنداعى ايماقتىق جانە عالامدىق دەڭگەيدەگى ىنتىماقتاستىقتى قولداپ كەلەدى»، - دەلىنگەن قاسىم-جومارت توقايەۆتىڭ العىسوزىندە.
پرەزيدەنت قازاقستان اگروونەركاسىپ كەشەنى، مۇناي-حيميا، مەتاللۋرگيا، وڭدەۋ جانە توقىما ونەركاسىبى، كولىك جانە لوگيستيكا، قارجى سەكتورى مەن تۋريزم سالالارىندا زور كۇش-قۋاتقا يە ەكەندىگىن اتاپ وتكەن. وسى ورايدا، ينۆەستيسيالىق اۋقاتتىڭ تۇراقتى تۇردە دامۋى – مەملەكەت ساياساتىنداعى ماڭىزدى باسىمدىق.
وتكەن جىلى قازاقستان 28 ملرد اقش دوللارى بولاتىن شەتەلدىك تىكەلەي ينۆەستيسيالاردى يەلەندى، بۇل – سوڭعى ونجىلدىقتىڭ رەكوردتىق كورسەتكىشى. «جالپى، تىكەلەي شەتەلدىك ينۆەستيسيا (تشي) كولەمى بۇگىندە 383 ملرد اقش دوللارى كولەمىندە»، - دەپ كورسەتىلگەن پرەزيدەنت سوزىندە.
الماتىدا وتكىزىلىپ وتىرعان حالىقارالىق فورۋم ازيا-تىنىق مۇحيت ايماعىندا ينۆەستيسيالىق ىنتىماقتاستىقتىڭ ارتۋىنا قۋاتتى سەرپىن بەرىپ قانا قويماي، ازيا-تىنىق مۇحيتى مەملەكەتتەرى مەن قازاقستان رەسپۋبليكاسىنىڭ قارجى-ەكونوميكالىق سەرىكتەستىگىن كەڭەيتپەك.