قاسىم-جومارت توقايەۆ يۆان كورچوكتىڭ قازاقستانعا ساپارىنىڭ ماڭىزدىلىعىنا توقتالىپ، بۇل كەزدەسۋ ەكىجاقتى ىنتىماقتاستىقتى دامىتۋعا تىڭ سەرپىن بەرەتىنىن اتاپ ءوتتى.
كەزدەسۋ بارىسىندا ساۋدا-ەكونوميكالىق جانە ينۆەستيسيالىق ىنتىماقتاستىقتى نىعايتۋعا باعىتتالعان قازاقستان-سلوۆاكيا قاتىناستارىنىڭ پەرسپەكتيۆالارى تالقىلاندى، دەپ حابارلايدى Almaty-akshamy.kz
سونداي-اق اۋعانستانداعى جاعدايدى تۇراقتاندىرۋعا قاتىستى ايماقتىق قاۋىپسىزدىك ماسەلەلەرى قاراستىرىلدى.
«ءسىزدىڭ ساپارىڭىز قازاقستانداعى تاريحي داتاعا سايكەس كەلىپ وتىر. ەكى ايدان كەيىن ەل تاۋەلسىزدىگىنىڭ 30 جىلدىعىن اتاپ وتەمىز. كەلەسى جىلى سلوۆاكيا دا وسىنداي تاريحي مەجەگە جەتەدى. 2019 جىلى ءبىز براتيسلاۆادا ەلشىلىك اشتىق. بۇل ءبىزدىڭ كوپتەگەن باعىت بويىنشا تىعىز ىنتىماقتاستىق ورناتۋعا بەيىلدى ەكەنىمىزدى كورسەتەدى»، – دەدى قاسىم-جومارت توقايەۆ.
پرەزيدەنت مينيسترگە قازاقستاندا COVID-19 ىندەتىنە قارسى كۇرەس بويىنشا قابىلدانعان شارالار، اۋعانستانداعى جاعدايدى تۇراقتاندىرۋ مەن وسى ەلگە كورسەتىلىپ جاتقان گۋمانيتارلىق كومەك تۋرالى ايتتى.
يۆان كورچوك قاسىم-جومارت توقايەۆقا كەزدەسۋگە مۇمكىندىك بەرگەنى ءۇشىن ريزاشىلىعىن ءبىلدىرىپ، كەلە جاتقان تاۋەلسىزدىك مەرەيتويىمەن قۇتتىقتادى.
مينيستر پرەزيدەنتتىڭ قازاقستاندى جاڭعىرتۋ ىسىندەگى كوشباسشىلىق قابىلەتىن، حالىقتىڭ ءال-اۋقاتىن ارتتىرۋداعى جانە مەملەكەتتىڭ قاۋىپسىزدىگىن نىعايتۋداعى ەڭبەگىن سلوۆاكيا باسشىلىعى جوعارى باعالايتىنىن جەتكىزدى.
كەزدەسۋ سوڭىندا قاسىم-جومارت توقايەۆ سلوۆاكيا باسشىسى زۋزانا چاپۋتوۆاعا سالەمىن جولداپ، ونىڭ كەلەسى جىلى قازاقستانعا ساپارمەن كەلەتىنىنە ۇمىتتەنەتىنىن ايتتى.