مەملەكەت باسشىسى قازاق-فرانسۋز بيزنەس فورۋمى اياسىندا فرانسيانىڭ بيزنەس قۇرىلىمدارىنىڭ باسشىلارىمەن كەزدەستى، دەپ حابارلايدى almaty-akshamy.kz
Lactalis Group كومپانياسىنىڭ باس ديرەكتورى ەممانيۋەل بەنەمەن اڭگىمەلەسۋ بارىسىندا مەملەكەت باسشىسى اتالعان كاسىپورىن قازاقستان نارىعىنا 20 جىل بۇرىن كەلگەن العاشقى فرانسۋز كومپانيالارىنىڭ ءبىرى ەكەنىن اتاپ ءوتتى. بۇگىندە بۇل كاسىپورىننىڭ بىرنەشە زاۋىتى مەن ءسۇت فەرمالارى ەلىمىزدە تابىستى جۇمىس ىستەپ جاتىر.
قاسىم-جومارت توقايەۆتىڭ ايتۋىنشا، ازىق-تۇلىك قاۋىپسىزدىگىنىڭ جاھاندىق سىن-قاتەرلەرىنە بايلانىستى اگروونەركاسىپ جانە ازىق-تۇلىك ونىمدەرىن ءوندىرۋ سالالارىنداعى ىنتىماقتاستىقتىڭ ءمان-ماڭىزى ارتىپ كەلەدى. وسىعان وراي قازاقستان اۋىل شارۋاشىلىعى ونىمدەرىن تەرەڭ وڭدەۋ ىسىنە ينۆەستيسيا تارتۋدى ىنتالاندىرادى.
ەممانيۋەل بەنە قابىلداعانى ءۇشىن مەملەكەت باسشىسىنا العىس ايتىپ، Lactalis Group كومپانياسىنىڭ ىنتىماقتاستىقتى نىعايتۋ جانە قازاقستاندا جاڭا ءوندىرىس ورىندارىن اشۋ جوسپارىمەن ءبولىستى.
سودان كەيىن مەملەكەت باسشىسى Boehringer Ingelheim France كومپانياسىنىڭ پرەزيدەنتى كريستيان ۆايزەندى قابىلدادى. كەزدەسۋ بارىسىندا قاسىم-جومارت توقايەۆ وتاندىق QazBioPharm حولدينگى مەن فرانسيانىڭ Boehringer Ingelheim كومپانياسى اراسىندا تەحنولوگيالاردى بەرۋ تۋرالى قول جەتكىزىلگەن كەلىسىمنىڭ ماڭىزدىلىعىن اتاپ ءوتتى. بۇل قازاقستاندا اۋسىلعا قارسى ۆاكسينا ءوندىرىسىن جولعا قويۋعا مۇمكىندىك بەرەدى. مەملەكەت باسشىسىنىڭ ايتۋىنشا، ۆەتەريناريا سالاسىن دامىتۋ ازىق-تۇلىك قاۋىپسىزدىگىن قامتاماسىز ەتۋدە ەرەكشە ءرول اتقارادى.
قازاقستان پرەزيدەنتى ەلىمىزدە بيوتەحنولوگيا كلاستەرىن قۇرۋ جۇمىستارى بەلسەندى جۇرگىزىلىپ جاتقانىن جانە وسى سالاداعى وتاندىق عىلىمي ساراپتاما جاساۋ ءىسىن دامىتۋ ءۇشىن QazBioPharm ۇلتتىق بيوفارماسيەۆتيكالىق حولدينگى قۇرىلعانىن ايتتى.
سونىمەن قاتار پرەزيدەنت Semmaris كومپانياسىنىڭ باس ديرەكتورى ستەفان لايانيمەن كەزدەستى. ستەفان لاياني قاسىم-جومارت توقايەۆقا الماتى وبلىسىندا اۋىل شارۋاشىلىعى ونىمدەرىن وڭدەيتىن ءىرى حاب قۇرۋ جونىندەگى بىرلەسكەن جوبانىڭ ىسكە اسىرىلۋىنا قاتىستى مالىمەت بەردى. نىسان 2025 جىلى پايدالانۋعا بەرىلەدى دەپ جوسپارلانىپ وتىر. قازىرگى ۋاقىتتا قازاقستان ينۆەستيسياسىنىڭ جالپى كولەمى 150 ميلليون دوللاردى قۇرايدى. كومپانيا ءوز تاراپىنان جوبانى جۇزەگە اسىرۋدىڭ باستاپقى كەزەڭىندە تەحنولوگيالار مەن فرانسيانىڭ وزىق تاجىريبەسىن ترانسفەرت جاسايدى.