ولجاس بەكتەنوۆ جاپوندىق JBIC بانكىنىڭ ءتوراعاسى حاياششي نوبۋميسۋمەن ينۆەستيسيالىق ىنتىماقتاستىقتى كەڭەيتۋ پەرسپەكتيۆالارىن تالقىلادى
قازاقستان پرەمەر-مينيسترى ولجاس بەكتەنوۆ JBIC (Japan Bank for International Cooperation) جاپونيا حالىقارالىق ىنتىماقتاستىق بانكىنىڭ ءتوراعاسى حاياششي نوبۋميسۋمەن كەزدەستى. قارجى سالاسىنداعى ىنتىماقتاستىقتى كەڭەيتۋ جانە بىرلەسكەن ينۆەستيسيالىق جوبالاردى ىسكە اسىرۋ ماسەلەلەرى تالقىلاندى.
جاپونيا قازاقستاننىڭ شىعىس ازياداعى نەگىزگى سەرىكتەستەرىنىڭ ءبىرى ءارى بۇگىندە ۇزدىك-10 ءىرى ينۆەستورلار قاتارىنا كىرەدى. قازاقستان مەن جاپونيا اراسىنداعى تاۋار اينالىمى وتكەن جىلى 10،5%-عا ءوسىپ، $2،1 ملرد-قا جەتتى. بيىلعى قاڭتار-مامىر ايلارىندا ءوزارا ساۋدا كورسەتكىشى $768 ملن-دى قۇرادى. 1993 جىلدان بەرى جاپونيانىڭ قازاقستان ەكونوميكاسىنا كاپيتال سالىمدارىنىڭ جيناقتالعان كولەمى شامامەن $8 ملرد-قا جەتتى.
ۇكىمەت باسشىسى JBICء-تىڭ ەكى ەل اراسىنداعى ساۋدا-ەكونوميكالىق قاتىناستاردى دامىتۋعا قوسقان ەلەۋلى ۇلەسىن اتاپ ءوتتى. JBIC جاپونيا حالىقارالىق ىنتىماقتاستىق بانكى قازاقستاندا ەنەرگيامەن جانە سۋمەن جابدىقتاۋ، تاۋ-كەن ونەركاسىبى، سونداي-اق كولىك-لوگيستيكا سالالارىندا قۇنى $2،3 ملرد بولاتىن 26 جوبانى ىسكە اسىرۋدى قارجىلاندىردى. قازاقستاننىڭ دامۋ بانكىمەن بىرلەسىپ ەنەرگەتيكا (جەك قوسا العاندا)، كولىك سالاسى، ماشينا جاساۋ، ازىق-تۇلىك ونەركاسىبى جانە باسقا دا باسىم سالالارداعى بىرلەسكەن جوبالاردى $200 ملن سوماسىنا قارجىلاندىرۋ نيەتى بويىنشا كەلىسىمگە قول قويۋ جوسپارلانىپ وتىر.
«جاپونيانىڭ وڭتۇستىگىندە ورىن العان جەر سىلكىنىسىنە بايلانىستى حاباردى وكىنىشپەن قابىلدادىم. ەڭ باستىسى، ادامدار امان بولىپ، تابيعي اپات اۋقىمدى شىعىندارعا الىپ كەلمەيدى دەپ ۇمىتتەنەمىن. جاپونيا – ءبىزدىڭ نەگىزگى ساۋدا-ەكونوميكالىق ءارى ينۆەستيسيالىق سەرىكتەسىمىز. بۇگىندە قازاق-جاپون قاتىناسى كەڭەيتىلگەن ستراتەگيالىق ارىپتەستىك رۋحىندا دامىپ كەلەدى. قازاقستان ۇكىمەتى ىنتىماقتاستىق كوكجيەگىن كەڭەيتۋ نيەتىن قۇپتايدى جانە بىرلەسكەن جوبالاردى ىسكە اسىرۋدا قاجەتتى قولداۋ كورسەتۋگە دايىن»، — دەپ اتاپ ءوتتى ولجاس بەكتەنوۆ.
ءوز كەزەگىندە JBIC ءتوراعاسى حاياششي نوبۋميسۋ ESG (Environment، Sustainability، Governance) شەڭبەرىندە «جاسىل» قارجى جانە ترانزيتتىك قارجىلاندىرۋ سالاسىنداعى بىرلەسكەن ينۆەستيسيالىق جوبالاردى ىسكە اسىرۋعا مۇددەلى ەكەنىن اتاپ ءوتتى.
كەزدەسۋ قورىتىندىسى بويىنشا تاراپتار بارلىق پەرسپەكتيۆالى باعىتتار بويىنشا ىنتىماقتاستىقتى نىعايتۋعا جانە كەڭەيتۋگە نيەت ءبىلدىردى.