قازاقستان ورماندارىنىڭ سيفرلى كارتالارى جاسالىپ جاتىر

قازاقستاندا 18،6 ملن گا ورمان القابى بار.

ەلىمىزدە ورماندى زاڭسىز كەسۋ فاكتىلەرى عارىشتىق مونيتورينگ ارقىلى انىقتالىپ جاتىر، دەپ حابارلايدى Almaty-akshamy.kz

بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ق ر سيفرلىق دامۋ، قورعانىس جانە اەروعارىش ونەركاسىبى مينيسترلىگى اەروعارىش كوميتەتىنىڭ ءتوراعاسى باۋبەك ورالماعامبەتوۆ ءمالىم ەتتى.

«ەكولوگيا مينيسترلىگىنە قاراستى ورمان شارۋاشىلىعى جانە جانۋارلار دۇنيەسى كوميتەتىمەن بىرلەسىپ ەلىمىزدەگى ورمان كارتالارى سيفرلاندىرىلدى. وزدەرىڭىز بىلەتىندەي، ورمان قورى مەملەكەتتىڭ باقىلاۋىندا جانە ول عارىشتىق مونيتورينگ ارقىلى جۇزەگە اسىرىلادى. بىزدەگى بار قازىرگى دەرەكتەر بويىنشا، قازاقستاندا 18،6 ملن گا ورمان القابى بار. عارىشتىق مونيتورينگ ارقىلى ورماندى باقىلاپ قانا قويماي، ءورت ءقاۋپىنىڭ الدىن الۋعا دا بولادى. سوندىقتان دا ەلىمىزدەگى ورمان كارتالارى سيفرلاندىرىلدى. سونداي-اق، ورمانعا قاتىستى ەكىنشى پروبلەما - زاڭسىز اعاش كەسۋ. ەندىگى ۋاقىتتا بۇل قۇقىقبۇزۋشىلىقتى دا عارىشتىق مونيتورينگ ارقىلى قاداعالاۋعا مۇمكىندىك بار»، - دەدى باۋبەك ورالماعامبەتوۆ.