البانيا استاناسىندا ماتەماتيكادان 27ء-شى حالىقارالىق جاسوسپىرىمدەر بالقان وليمپياداسى (JBMO) اياقتالدى.
بىلىمدىلەر سايىسىندا بالقان تۇبەگىنەن 20 ەل جانە قوناق ەلدەردەن بارلىعى 130-عا جۋىق وقۋشى ب ا ق سىنادى، دەپ حابارلايدى Almaty-akshamy.kz.
وقۋ-اعارتۋ مينيسترلىگىنەن ءمالىم ەتكەندەي، حالىقارالىق ماتەماتيكا جارىسىندا قازاقستان قۇراما كومانداسى 6 مەدال جەڭىپ الىپ، 100% ناتيجە كورسەتتى.
جەڭىمپازدار:
- الماتى قالاسىنىڭ «رەسپۋبليكالىق فيزيكا-ماتەماتيكالىق مەكتەبى» كەاق 9-سىنىپ وقۋشىسى اميرلان امانجولوۆ –– التىن مەدال؛
- اقتوبە وبلىستىق دارىندى ەر بالالارعا ارنالعان «ءبىلىم-يننوۆاسيا» مامانداندىرىلعان ليسەي-ينتەرناتىنىڭ 9-سىنىپ وقۋشىسى سەرىك مۇرزابەك –– كۇمىس مەدال؛
- اقتوبە وبلىستىق دارىندى ەر بالالارعا ارنالعان «ءبىلىم-يننوۆاسيا» مامانداندىرىلعان ليسەي-ينتەرناتىنىڭ 9-سىنىپ وقۋشىسى ەرقانات كەڭشىلىك –– كۇمىس مەدال؛
- شىعىس قازاقستان وبلىستىق دارىندى بالالارعا ارنالعان «ءبىلىم-يننوۆاسيا» مامانداندىرىلعان ليسەي-ينتەرناتىنىڭ 9-سىنىپ وقۋشىسى ءالينۇر مارات ۇلى –– قولا مەدال؛
- قاراعاندى وبلىستىق №1 «ءبىلىم-يننوۆاسيا» ليسەي-ينتەرناتىنىڭ 9-سىنىپ وقۋشىسى جانارىس تەڭدىكوۆ –– قولا مەدال؛
- اتىراۋ وبلىستىق №1 «ءبىلىم-يننوۆاسيا» ليسەي-ينتەرناتىنىڭ 9-سىنىپ وقۋشىسى ايات ابدۋللايەۆ –– قولا مەدال.
«قاتىسۋشىلار ماتەماتيكالىق وليمپيادالاردىڭ ەرەجەلەرىنە سايكەس قۇراستىرىلعان اۆتورلىق تاپسىرمالار ورىندادى. ولاردى شەشۋ ءۇشىن مىندەتتى تۇردە ەرەكشە ءتاسىل قاجەت. JBMO-عا قاتىسۋ – بارلىق قاتىسۋشىلار ءۇشىن وتە قىسقا ۋاقىتتا ماسەلەلەردى شەشۋدە ءوز قابىلەتىن تەكسەرۋگە جاقسى مۇمكىندىك»، - دەيدى توپ جەتەكشىسى ۆلاديمير جۋك.
ايتا كەتەيىك، 19 جىلدا اتالعان وليمپياداعا 114 قازاقستاندىق وقۋشى قاتىسىپ، 15 التىن، 47 كۇمىس، 37 قولا مەدال جەڭىپ الدى.