اللەرگيا كەزەڭى باستالعالى دەرتكە شالدىققاندار سانى كوبەيگەن.
كۇن جىلىعالى، ماۋسىمدىق اللەرگيا دەرتى ءورشي ءتۇستى. ءدارىسىز جۇرە المايتىندار دا كوبەيگەن، دەپ حابارلايدى Almaty-akshamy.kz.
اللەرگيا دەرتى مازاسىن قاشىرعان جانداردىڭ ءبىرى - قىرمىزى زارىقحانوۆا. ءوزىنىڭ ايتۋىنشا، بۇل دەر ورشىگەن كەزدە ۇيقى قاشىپ، ءوزىن جايسىز سەزىنەدى ەكەن.
«وسى كەزدەردە ماعان كوشەدە شىعىپ ءجۇرۋ وتە قيىنعا سوعادى. كوشەگە ءبىر شىعىپ كەلگەننەن كەيىن دە تۇنىمەن ۇيىقتاۋ دەگەن سەكىلدى ۇلكەن ماسەلە تۋىنداتادى. سەبەبى، بىلاي ايتقاندا، ەشقانداي ءدارىسىز، پرەپاراتتارسىز جۇرە المايمىن، ءوزىمدى جاقسى سەزىنە المايمىن»، - دەيدى ستۋدەنت قىرمىزى زارىقحانوۆا.
مامانداردىڭ ايتۋىنشا، اللەرگيا تۇقىم قۋالايدى. 70% جاعدايدا قان ارقىلى تارايدى. ءبىراق بۇل دەرت يممۋنيتەتى تولىق قالىپتاسپاعان ادامداردان دا انىقتالىپ جاتادى. اسىرەسە بالا كەزدە انتيبيوتيكتىك دارىلەردى شامادان تىس تۇتىنۋ ەسەيگەندە وسى اللەرگياعا اكەلەدى.
«پوللينوز بىرنەشە سيندرومعا بولىنەدى. رينوكونيۋكتيۆالدى سيندروم كوزدىڭ قىشۋى مەن تىنىس الۋ جولدارىنىڭ بىتەلۋى سياقتى بەلگىلەر ارقىلى جۇرەدى. تۇشكىرۋ، مۇرىن بىتەلۋ – بارلىق سيندرومنىڭ ىشىندەگى ەڭ ءقاۋىپسىزى. ال برونحيالدى وبسترۋكسيا – اللەرگيانىڭ ەڭ ءقاۋىپتى ءتۇرى. ول كەزدە تىنىس الۋ ناشارلايدى»، - دەيدى اللەرگولوگ روزەنسون رافايل.
اللەرگيانى قوزدىراتىن فاكتور كوپ. ءبىز تۇتىناتىن تاعامدار مەن كوكەنىستەردىڭ دە كەرى اسەرى بار. سوندىقتان ديەتولوگ يمۋندىق دەرتكە ارنالعان گيپواللەرگەندى ديەتا ۇستاۋعا كەڭەس بەرەدى.
«تاماقتار جايلى ايتاتىن بولساق، ول قىزىل ءتۇستى، توقسارى ءتۇستى، سارى ءتۇستى كوپ تۇتىنباۋعا كەڭەس بەرەمىن. سودان كەيىن سۋسىنداردىڭ ىشىندە قۇرامىندا قانتى كوپ بوياۋىشتار، كونسەرۆانتتار بار، ەنەرگەتيكالىق سۋسىندار، مىنە، قازىرگى كەزەڭدە كوپ كوفە ءىشىپ جاتادى. بۇلاردىڭ بارلىعىن تۇتىنباۋعا كەڭەس بەرەمىن»، - دەيدى ديەتولوگ گۇلميرا ەربول قىزى.
تەك تاماق ەمەس، شاڭ-توزاڭ، قورشاعان ورتانىڭ لاستانۋى، ءتىپتى كۇيزەلىستىڭ ءوزى، وسى اللەرگياعا اكەلىپ سوعادى. ودان قورعانۋ ءۇشىن اۋىزدى عانا تىيماي، كيىمگە دە ءمان بەرۋ كەرەك.
«بارىنشا جابىق كيىنۋ، باس كيىمدەردى كيۋگە كەڭەس بەرەمىن. جازدىڭ ەڭ ىستىق كۇندەرىندە ەكى قاباتتى فلانەليدەن تىگىلگەن دىمقىل ماسكا كيۋ كەرەك. كۇن سۋىتىپ، جاڭبىرلار باستالعاندا پوللينوزدىڭ ماۋسىمى اياقتالادى، تامىزدىڭ 10-ىنان 20-سىنا دەيىن – اللەرگيانىڭ ءورشىپ تۇراتىن مەزگىلى. وسىمدىكتەردىڭ 187 تۇرىنەن 140 وسى 10 كۇندە بىردەي گۇلدەيدى. سوندىقتان دا قازاقستاندىقتار ءۇشىن بۇل مەزگىل قولايسىزدىق تۋدىرادى»، - دەيدى اللەرگولوگ روزەنسون رافايل.
مامانداردىڭ ايتۋىنشا، اللەرگيادان قۇلانتازا ايىعۋ قيىن. تەك الدىن الۋ كەرەك. ول ءۇشىن كوكتەم كەلمەي تۇرىپ، قىس ىشىندە يممۋنيتەتتى كۇشەيتكەن ءجون.