قازاقستان-ومان بىرلەسكەن كوميسسياسى قۇرىلادى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
«پرەمەر-مينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردىنىڭ ديپلوماتيالىق قاتىناستار ورناعاننان كەيىنگى 30 جىلدا العاش رەت ومان سۇلتاندىعى مەن باحرەين كورولدىگىنە رەسمي ساپارى ءوتتى. مۇحتار تىلەۋبەردى ومان سۇلتاندىعى پرەمەر-مينيسترىنىڭ حالىقارالىق قاتىناستار جانە ىنتىماقتاستىق جونىندەگى ورىنباسارى اساد بين تاريكپەن كەزدەستى. كەلىسسوزدەر بارىسىندا تاراپتار ەكىجاقتى ىنتىماقتاستىقتىڭ نەگىزگى باعىتتارى مەن حالىقارالىق كۇن ءتارتىبىنىڭ وزەكتى ماسەلەلەرىن تالقىلادى. كەزدەسۋ قورىتىندىسى بويىنشا سىرتقى ساياسي ۆەدومستۆولاردىڭ باسشىلارى بىرلەسكەن كوميسسيا قۇرۋ تۋرالى ۇكىمەتارالىق كەلىسىمگە، سونداي-اق ساياسي كونسۋلتاسيالار تۋرالى مەموراندۋمعا قول قويدى. تاراپتار قازاقستان-ومان بىرلەسكەن كوميسسياسى اياسىندا جان-جاقتى ىنتىماقتاستىقتى ودان ءارى تەرەڭدەتۋگە، اتاپ ايتقاندا ساۋدا-ەكونوميكالىق جانە ينۆەستيسيالىق سالالارداعى ءوزارا ءىس-قيمىلدى جانداندىرۋعا ۋاعدالاستى»، - دەدى ايبەك سمادياروۆ ۆەدومستۆودا وتكەن بريفينگ بارىسىندا.
سونداي-اق ونىڭ اتاپ وتۋىنشە، ۇكىمەت باسشىسىنىڭ ورىنباسارى وماننىڭ قارجى ءمينيسترى سۇلتان ءال حابسيمەن كەلىسسوزدەر جۇرگىزدى. وندا قازاقستاندا يسلامدىق قارجىلاندىرۋدى دامىتۋ تاقىرىبى تالقىلاندى. قازاقستاندىق تاراپ وسى سالاداعى بىرلەسكەن جوبالاردى ىسكە اسىرۋ ءۇشىن «استانا» حالىقارالىق قارجى ورتالىعىنىڭ الاڭىن قاراستىرۋدى ۇسىندى.
«2023 جىلعى 2 اقپاندا قازاقستاننىڭ سىرتقى ساياسي ۆەدومستۆوسىنىڭ باسشىسى باحرەين كورولى حاماد بەن يسا ءال-حاليفانىڭ قابىلداۋىندا بولدى، وعان ق ر پرەزيدەنتى قاسىم-جومارت توقايەۆتىڭ اتىنان جىلى لەبىزدەرى مەن تىلەكتەرىن جەتكىزدى. مۇحتار تىلەۋبەردى سۇحباتتاسىن قازاقستاننىڭ ساياسي جانە ەكونوميكالىق جاڭعىرۋىنىڭ جاڭا كەزەڭىمەن تانىستىردى. ءوز كەزەگىندە كورول قازاقستاننىڭ قازىرگى دامۋ قارقىنىن جوعارى باعالاپ، قازاقستان حالقىنىڭ يگىلىگى ءۇشىن جۇرگىزىلىپ جاتقان پرەزيدەنت رەفورمالارىنا قولداۋ ءبىلدىردى. قازاقستان-باحرەين ساياسي ءوزارا ءىس-قيمىلىنىڭ دامۋ سەرپىنىن ەسكەرە وتىرىپ، تاراپتار ديالوگتى جوعارى دەڭگەيدە جالعاستىرۋدىڭ ماڭىزدىلىعىن اتاپ ءوتتى. ساۋدا-ەكونوميكالىق بايلانىستاردى كەڭەيتۋ ماقساتىندا كولىكتىك-لوگيستيكالىق ماسەلەلەردى شەشۋ ءۇشىن بىرلەسكەن كۇش-جىگەر جۇمساۋعا كەلىستى. سونداي-اق، الەمدەگى حالىقارالىق جاعداي، وڭىرلىك جانە جاھاندىق قاۋىپسىزدىك ماسەلەلەرى بويىنشا پىكىر الماسۋ بولدى»، - دەدى رەسمي وكىل.