كورمە اقپان ايىنىڭ سوڭىنا دەيىن جالعاسادى
مەملەكەتتىك ورتالىق مۋزەيىندە قازاقستاننىڭ كاسىبي سۋرەتشىلەرى گۇلجامال تاگەنوۆا، سۆەتلانا سوي جانە گۇلشات ماديبييەۆانىڭ «كوكتەم اۋەنى» ونەر تۋىندىلارىنىڭ كورمەسى ءوتىپ جاتىر، دەپ حابارلايدى Almaty-akshamy.kz.
سۋرەتتىڭ قۇدىرەتى... دۇنيەنى كوزبەن كورىپ، ءتۇيسىنۋ نەگىزىندە بەينەلەيتىن ونەردىڭ بۇل سالاسى ادامدى تاڭعاجايىپ الەمنىڭ تۇڭعيىعىنا بويلاتاتىنى ءسوزسىز.
كوكەيدەگى وي-قيالدى قىلقالام ۇشىنا سىيدىرا العان سۋرەتشىنىڭ كوز مايىن تاۋىسىپ سالعان شىعارماسىنا قىزىقپاۋ مۇمكىن ەمەس.
گۇلجامال تاگەنوۆا – بەلگىلى قازاقستاندىق سۋرەتشى، پەداگوگيكالىق تاجىريبەسى مول، بەلگىلى قازاقستاندىق سۋرەتشى، ق ر سۋرەتشىلەر وداعىنىڭ مۇشەسى. ونىڭ جۇمىستارى قازاقستان مۋزەيلەرىندە جانە گەرمانيا، يتاليا، اقش، گرەسيا، تۇركيا، فرانسيا، شۆەيساريا جانە ت. ب. جەكە كوللەكسيالارى ۇسىنىلعان.
گۇلشات ماديبييەۆا 2021 جىلدان باستاپ جاپونيانىڭ حالىقارالىق اكۆارەل ينستيتۋتىنىڭ (نيگاتا/جاپونيا) تولىق قاۋىمداستىرىلعان مۇشەسى، ق ر سۋرەتشىلەر وداعىنىڭ مۇشەسى. شىعارماشىلىقپەن اينالىسادى، حالىقارالىق، رەسپۋبليكالىق كورمەلەرگە، سيمپوزيۋمداردارعا جانە عىلىمي كونفەرەنسيالارعا قاتىسۋشىسى، شىعارماشىلىقتاعى ءبىلىمى مەن داعدىلارىن جەتىلدىرۋدە.
سۆەتلانا سوي – 2009 جىلدان باستاپ حالىقارالىق كورمەلەر مەن پلەنەرلەرگە بەلسەندى قاتىسادى، شەتەلدىك كەسكىندەمەدەگى جەتىستىكتەرى ءۇشىن سەۋل (وڭتۇستىك كورەيا) «ازيا كوشباسشىسى-2022» ناگرادالارىنا يە، سونداي-اق ق ر سۋرەتشىلەر وداعىنىڭ مۇشەسى.
شارانى اشقان ورتالىق مۋزەيدىڭ ديرەكتورى راشيدا حاريپوۆا: «سۋرەتشى ويشىل بولۋى كەرەك، تاريحتى جاقسى ءبىلۋى كەرەك. وسى ورايدا كورمەدەگى كەرەمەت ۇيلەسىم تاپقان تۋىندىلار شەبەرلىك تاسىلدەرىمەن تاڭ قالدىرادى. ءۇش سۋرەتشى كەنەپكە ءوز دۇنيەتانىمىن، ۇلتتىق مادەنيەت پەن تاريحتىڭ ەرەكشەلىكتەرىن قىلقالام ارقىلى سەزىممەن جەتكىزە بىلگەن» - دەپ اتاپ ءوتتى.
ق ر سۋرەتشىلەر وداعى قوعامدىق بىرلەستىگىنىڭ باسقارما ءتوراعاسى ومىربەك جۇبانيازوۆ، قازاقستان سۋرەتشىلەر وداعى الماتى وبلىسى فيليالىنىڭ ءتوراعاسى ەرمۇحان ءجۇنىسحان، «ۇلار» زاماناۋي ونەر گالەرەياسىنىڭ ديرەكتورى يۋريي ماركوۆيچ كورمە اۆتورلارىن قۇتتىقتاپ، ءتول مادەنيەتىمىزگە قوسقان ۇلەسى ءۇشىن ريزاشىلىق ءبىلدىرىپ، العىس حاتتارىن تابىستادى.
بۇگىنگى تاڭدا قازاقستاننىڭ زاماناۋي سۋرەتشىلەرى شىعارماشىلىق ەركىندىككە يە بولا وتىرىپ، ۇلتتىق ناقىشتى، ميفولوگيانى، ەجەلگى نانىمدار مەن شىعىس موتيۆتەرىن كورسەتە وتىرىپ، ساباقتاستىق پەن وزىندىك ەرەكشەلىگىن ساقتاپ قالدى. سۋرەتشىلەر ءتۇرلى-تۇستى قاراما-قايشىلىقتارمەن، قيالدى، تىنىشتىقتى جانە قورشاعان الەممەن ۇيلەسىمدى بىرلىكتى جەتكىزەتىن ەرەكشە ومىرلىك ەنەرگيامەن تولتىرىلعان جارقىن، ستيلدەندىرىلگەن جانە ەرەكشە كەسكىندەمە سۋرەتتەرىن ۇسىنادى. ءبىز سۋرەتتەردەگى نازىك، سالماقسىز سۇلۋلاردىڭ كوكتە قالىقتاپ، گۇلدەرگە باتىپ، كەڭىستىكتى كوكتەمنىڭ، جاستىق پەن قۋانىشتىڭ سەزىمى مەن كۇتۋىمەن تولتىراتىنىن كورە الامىز.
«كەسكىندەمە ونەرىنە، ماماندىعىنا شەكسىز ادال ءۇش سۋرەتشى بۇگىن ناعىز كوكتەم مەرەكەسىن سىيلادى. ءارقايسىنىڭ جەكە اۆتورلىق ءستيلى بار قىلقالام شەبەرلەرىن ونەرگە، ماماندىعىنا دەگەن شەكسىز سۇيىسپەنشىلىك بىرىكتەرەدى»، - دەدى قۇتتىقتاۋ سوزىندە ءا.قاستەيەۆ اتىنداعى مەملەكەتتىك ونەر مۋزەيىنىڭ عالىم حاتشىسى، ق ر سۋرەتشىلەر وداعىنىڭ مۇشەسى، ونەرتانۋشى ەكاتەرينا رەزنيكوۆا.