اتالعان نورما بۇۇ كونۆەنسياسىنا سايكەستەندىرىلدى.
قازاقستاندا ەندى مۇمكىندىگى شەكتەۋلى ادامدارعا قاتىستى «مۇگەدەك» ەمەس، «مۇگەدەكتىگى بار ادام» تەرمينى قولدانىلادى، دەپ حابارلايدى Almaty-akshamy.kz
پارلامەنت ءماجىلىسى مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋ ماسەلەلەرى تۋرالى زاڭ جوباسىن ءبىرىنشى وقىلىمدا ماقۇلدادى.
زاڭ جوباسىنا سەنات پەن ءماجىلىستىڭ ءبىر توپ دەپۋتاتى باستاماشىلىق جاسادى.
زاڭ جوباسى بويىنشا 75 زاڭنامالىق اكتىگە، ياعني 11 كودەكس جانە 64 زاڭعا وزگەرىستەر ەنگىزۋ جوسپارلانىپ وتىر.
«زاڭ جوباسىندا مۇگەدەك ادامدارعا قاتىستى ديسكريميناسياعا جول بەرمەۋ ماقساتىندا ءبىرقاتار نورمالار ەنگىزىلىپ وتىر. ونىڭ ىشىندە، «مۇگەدەك»، «مۇگەدەك بالا»، «ۇلى وتان سوعىسىنىڭ مۇگەدەگى» دەگەن سوزدەر تيىسىنشە «مۇگەدەكتىگى بار ادام»، «مۇگەدەكتىگى بار بالا» جانە «ۇلى وتان سوعىسى كەزىندە جارالانۋى، كونتۋزيا الۋى، زاقىمدانۋى جانە اۋرۋى سالدارىنان مۇگەدەكتىگى بار ادام» دەگەن سوزدەرمەن اۋىستىرىلادى»، - دەدى دەپۋتات ەلنۇر بەيسەنبايەۆ.
مىسالى، ونىڭ ايتۋىنشا، الەمدىك تاجىريبەدە «رeople-first language» دەگەن تۇسىنىك بار، ياعني، ءبىرىنشى كەزەكتە ونىڭ ادام بالاسى ەكەنىنە ءمان بەرىلىپ، كەيىن ونىڭ اۋرۋ-سىرقاتى جونىندە ايتىلۋى قاجەت.
سونداي-اق زاڭ جوباسىمەن جۇمىس ىستەۋ بارىسىندا دەپۋتاتتار «سوقىر»، «ساڭىراۋ»، «مىلقاۋ» دەگەن تەرميندەردى «كورۋ قابىلەتىنەن تولىق ايىرىلعان ادامدارعا»، «ەستۋ قابىلەتىنەن تولىق ايىرىلعان ادامدارعا»، «سويلەۋ قابىلەتىنەن تولىق ايىرىلعان ادامدارعا»، «مۇگەدەكتى وڭالتۋدىڭ جەكە باعدارلاماسى» دەگەن تەرميندى «مۇگەدەكتىگى بار ادامنىڭ ابيليتاسياسى جانە ونى وڭالتۋدىڭ جەكە باعدارلاماسىنا» وزگەرتۋ جونىندەگى زاڭ جوباسىنىڭ تۇجىرىمداماسىنا سايكەس كەلتىرۋگە باعىتتالعان تۇزەتۋلەر ەنگىزدى.
سونىمەن قاتار، وڭالتۋ، مۇگەدەكتىكتىڭ الدىن الۋ جانە وسى باعىتتاعى اتقارىلىپ جاتقان قىزمەتتەردى بىرىزدەندىرۋ ماقساتىندا «ابيليتاسيا» تۇسىنىگى ەنگىزىلدى.
ابيليتاسيانىڭ ساپالى ۇيىمداستىرىلۋى، مەديسينالىق رەابيليتاسياداعى ەم-دومنىڭ ساپاسىن ەداۋىر كوتەرەتىن الەۋمەتتىك-پسيحولوگيالىق، مەديسينالىق كومەك.