كونستيتۋسيادان ەلباسى دەگەن ءسوز الىنىپ تاستالدى.
ال ەلباسى مەن ونىڭ وتباسىن قورعايتىن، ارتىقشىلىقتار بەرەتىن تۇڭعىش پرەزيدەنت تۋرالى زاڭنىڭ كۇشى جويىلادى، دەپ حابارلايدى Almaty-akshamy.kz.
بۇل تۋرالى ءماجىلىس سپيكەرى ەرلان قوشانوۆ ايتتى.
«كونستيتۋسيادا تەك قانا مەملەكەتتىڭ نەگىزىن قالاۋشى دەگەن تاريحي ءرولى عانا قالدى. سوندىقتان كونستيتۋسيا قابىلدانعاننان كەيىن، تۇڭعىش پرەزيدەنت تۋرالى كونستيتۋسيالىق زاڭ دا كۇشىن جويادى دەپ كۇتىلۋدە»، - دەدى قوشانوۆ.
ول كونستيتۋسيادان ەلباسى دەگەن ءسوز الىنىپ تاستالعانىن ايتتى.
سونىمەن قاتار، قوشانوۆتىڭ ايتۋىنشا، نازاربايەۆقا قاتىستى ەكس-پرەزيدەنت تۋرالى نورما قولدانىلادى. بۇگىندە بۇل نورما كونستيتۋسيادا دا، پرەزيدەنت تۋرالى زاڭدا دا بار. بۇل رەتتە ءماجىلىس ءتوراعاسى ەكس-پرەزيدەنت تۋرالى نورما نازاربايەۆقا قانداي قۇقىق پەن قۇزىرەت بەرەتىنىن ناقتىلادى.
«بىرىنشىدەن، ار-نامىسى مەن ابىروي-بەدەلىن قورعاۋعا قۇزىرەت بەرەدى. ەكىنشىدەن، الەۋمەتتىك جاعىنان قورعاۋ، ياعني زەينەتاقىسى، كولىگى، كۇزەتى بار. وسى ماسەلەلەر مەملەكەت تاراپىنان رەتتەلەدى»، - دەدى ول.
ول جەردە نازاربايەۆتىڭ وتباسىن جاۋاپقا تارتۋعا قاتىستى نورما بار ما دەگەن سۇراققا سپيكەر «ونداي نورما جوق» دەپ جاۋاپ بەردى.
ايتا كەتەرى، 2000 جىلى «قازاقستان رەسپۋبليكاسىنىڭ تۇڭعىش پرەزيدەنتى - ەلباسى تۋرالى» كونستيتۋسيالىق زاڭ قابىلدانعان بولاتىن. وعان سايكەس، نۇرسۇلتان نازاربايەۆ پەن ونىڭ وتباسى مۇشەلەرى قورعالادى.
كونستيتۋسيالىق زاڭ بويىنشا نازاربايەۆتى ۇستاۋعا، قاماققا الۋعا، تىنتۋگە، ودان جاۋاپ الۋعا نە جەكە باسىن جەتە تەكسەرۋگە، كۇزەتپەن ۇستاۋعا بولمايدى.
سونىمەن قاتار، ەلباسى مەن ونىمەن بىرگە تۇراتىن وتباسى مۇشەلەرىنە تيەسىلى بارلىق جەكە مۇلىككە تيىسۋگە جانە شەكتەۋ قويۋعا بولمايدى.
جەكە مۇلىككە تۇرعىن جانە قىزمەتتىك ءۇي-جايلار، قىزمەتتىك كولىك، بايلانىس قۇرالدارى، حاتتار، قۇجاتتار كىرەدى. تيىسپەۋشىلىك قازاقستان تۇڭعىش پرەزيدەنتىنىڭ – ەلباسىنىڭ قورىنا جانە ول قۇرعان وزگە دە زاڭدى تۇلعالارعا تيەسىلى مۇلىككە دە قولدانىلادى.
بۇدان بولەك، كونستيتۋسيالىق زاڭ نازاربايەۆ پەن ونىمەن بىرگە تۇراتىن وتباسى مۇشەلەرىنە تيەسىلى بانك شوتتارىنىڭ قۇپيالىعىنا جانە وعان قول سۇقپاۋىنا كەپىلدىك بەرەدى.