مادەنيەت جانە اقپارات ءمينيسترى ايدا بالايەۆا موڭعوليانىڭ قازاقستانداعى ەلشىسى دورج بايارحۋۋمەن كەزدەستى، دەپ حابارلادى مينيسترلىكتىڭ باسپا ءسوز قىزمەتى.
كەزدەسۋ بارىسىندا ايدا بالايەۆا ۆەدومستۆو مادەنيەت، اقپارات، ءدىن سالاسى بويىنشا جانە مەملەكەت پەن ازاماتتىق قوعام اراسىنداعى ءوزارا ارەكەت ەتۋىنىڭ ءتيىمدى مودەلىن قۇرۋ، مەملەكەتتىك جاستار جانە وتباسىلىق ساياساتتى ىسكە اسىرۋ، سونداي-اق ەتنوسارالىق كەلىسىم سالاسىندا جۇمىس ىستەلىپ جاتقانىن حابارلادى.
دورج بايارحۋۋ موڭعوليا ءۇشىن مەدياسفەراداعى ىنتىماقتاستىق ەرەكشە قىزىعۋشىلىق تۋدىراتىنىن جەتكىزدى. وسىعان بايلانىستى، «حابار» اگەنتتىگى جانە «قازاقپارات» حالىقارالىق اقپاراتتىق اگەنتتىگى ءىرى موڭعوليالىق باق-پەن مەموراندۋمدارعا قول قويدى. بىرلەسىپ، دەرەكتى، كوركەم، انيماسيالىق فيلمدەر، سەريالدار شىعارۋ، سونداي-اق ەكى ەلدىڭ تاريحي-مادەني مۇراسىن زەرتتەۋگە ارنالعان ەكسپەديسيا قۇرۋ ءۇشىن ىنتىماقتاستىق مۇمكىندىكتەرى تالقىلاندى.
كەزدەسۋ سوڭىندا تاراپتار مادەني-گۋمانيتارلىق سالادا بىرلەسىپ جوسپار دايىنداۋعا كەلىستى. ونى ىسكە اسىرۋ ەكىجاقتى قارىم-قاتىناستى جاڭا دەڭگەيگە شىعارۋعا مۇمكىندىك بەرەدى.