2024 جىلعى 28 قازاندا ۇلان-باتىر قالاسىندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ موڭعولياعا مەملەكەتتىك ساپارى اياسىندا قازاقستان-موڭعوليا ىسكەرلىك كەڭەسىنىڭ العاشقى وتىرىسى ءوتتى، دەپ حابارلايدى aqshamnews.kz ق ر ءسدياوم باسپا ءسوز قىزمەتىنە سىلتەمە جاساپ.
ءىس-شارا بارىسىندا ەكى ەلدىڭ ىسكەرلىك ورتا مەن مەملەكەتتىك قۇرىلىم وكىلدەرى بىرلەسكەن جۇمىستىڭ باسىم باعىتتارىن تالقىلادى.
سيفرلىق دامۋ ءمينيسترى جاسلان مادييەۆ ءوز سوزىندە يننوۆاسيالىق ەكوجۇيەنى قۇرۋ، ستارتاپ-جوبالاردى دامىتۋ، سيفرلىق ۇكىمەتتى (govtech) ەنگىزۋ جانە اەروعارىش سالاسىنداعى جوبالار بويىنشا ىنتىماقتاستىقتى نىعايتۋ جونىندەگى نەگىزگى باعىتتاردى اتاپ ءوتتى.
قازاقستان ءوز كەزەگىندە Astana Hub حالىقارالىق تەحنوپاركىن دامىتۋ تاجىريبەسىمەن ءبولىستى، ونىڭ جۇمىسى بارىسىندا 1500-دەن استام رەزيدەنت، سونىڭ ىشىندە 436 شەتەلدىك كومپانيا تارتىلدى. سونىمەن قاتار، ورتالىق ەۋرازيادان شىققان ستارتاپتاردى جاھاندىق نارىقتاردا قولداۋعا باعىتتالعان شەتەلدەردە IT-حابتار قۇرۋدىڭ تابىستى تاجىريبەسى دە ۇسىنىلدى.
قازاقستاندىق Jet كومپانياسىنىڭ ەلەكتر سكۋتەرلەرىن جالعا بەرۋ ستارتاپىنىڭ موڭعوليا نارىعىنا شىعۋى ءساتتى بولعانى اتاپ ءوتىلدى – ول 6 مىڭنان استام سكۋتەر ۇسىندى. سونىمەن بىرگە، موڭعول ستارتاپتارى دا Astana Hub اكسەلەراسيالىق باعدارلامالارىنا بەلسەندى قاتىسىپ كەلەدى. مىسالى، Fibo Group ستارتاپى تەحنوپاركتە Google for Startups اكسەلەراسيالىق باعدارلاماسىنان ءساتتى ءوتتى. بۇل باعدارلاماعا قاتىسۋ ستارتاپتارعا حالىقارالىق تاجىريبە مەن جەتەكشى ساراپشىلاردىڭ قولداۋىنا جول اشادى، بۇل ولاردىڭ ءارى قاراي دامۋى مەن جاھاندىق نارىقتارعا شىعۋى ءۇشىن ماڭىزدى قادام سانالادى.
ىنتىماقتاستىقتىڭ تاعى ءبىر ماڭىزدى ەلەمەنتى رەتىندە قازاقستاندىق ەلەكتروندىق ۇكىمەت جۇيەسى eGov ەكسپورتىن تالقىلاۋ جۇرگىزىلدى. بۇل جوبا موڭعولياعا قازاقستاننىڭ مەملەكەتتىك قىزمەتتەردى سيفرلاندىرۋداعى جەتىستىكتەرىن قولدانۋعا مۇمكىندىك بەرەدى، مۇندا قىزمەتتەردىڭ 90%-دان استامى ونلاين رەجيمىندە ۇسىنىلادى.
ىسكەرلىك كەڭەستىڭ العاشقى وتىرىسى تۇراقتى دامۋعا جانە زاماناۋي سىن-قاتەرلەردى بىرلەسىپ ەڭسەرۋگە باعىتتالعان ستراتەگيالىق سەرىكتەستىكتىڭ بەرىك نەگىزىن قالادى.