سىبايلاس جەمقورلىققا قارسى ساياسات – سىبايلاس جەمقورلىق تاۋەكەلدەرىن ازايتۋعا، قوعامنىڭ مەملەكەتتىك ورگاندار قىزمەتىنە سەنىمىن ارتتىرۋعا باعىتتالعان قۇقىقتىق، اكىمشىلىك جانە ۇيىمداستىرۋشىلىق شارالار جيىنتىعى.
سىبايلاس جەمقورلىققا قارسى ءىس-قيمىل تۋرالى قازاقستان رەسپۋبليكاسىنىڭ 2015 جىلعى 18 قاراشاداعى № 410-V زاڭىنا سايكەس سىبايلاس جەمقورلىققا قارسى ءىس-قيمىلدىڭ نەگىزگى قاعيداتتارى مىنالار بولىپ تابىلادى:
- زاڭدىلىق؛
- ادام مەن ازاماتتىڭ قۇقىقتارىن، بوستاندىقتارى مەن زاڭدى مۇددەلەرىن قورعاۋ باسىمدىعى؛
- جاريالىلىق پەن اشىقتىق؛
- مەملەكەت پەن ازاماتتىق قوعامنىڭ ءوزارا ءىس-قيمىلى؛
- سىبايلاس جەمقورلىققا قارسى ءىس-قيمىل شارالارىن جۇيەلى جانە كەشەندى پايدالانۋ؛
- سىبايلاس جەمقورلىقتىڭ الدىن الۋ شارالارىن باسىم قولدانۋ؛
- سىبايلاس جەمقورلىققا قارسى ءىس-قيمىلعا جاردەم كورسەتەتىن ادامداردى قورعاۋ جانە كوتەرمەلەۋ؛
- سىبايلاس جەمقورلىق قۇقىق بۇزۋشىلىقتاردى جاساعانى ءۇشىن جازانىڭ بۇلتارتپاستىعى.
سىبايلاس جەمقورلىققا قارسى ءىس-قيمىلدىڭ ماقساتى – قوعامدا سىبايلاس جەمقورلىققا توزبەۋشىلىك احۋالىن قالىپتاستىرۋ، سىبايلاس جەمقورلىق قۇقىق بۇزۋشىلىقتارعا ىقپال ەتەتىن جاعدايلار مەن سەبەپتەردى انىقتاۋ جانە ولاردىڭ سالدارىن جويۋ.
سىبايلاس جەمقورلىق – بۇل عالامدىق ماسەلە، ودان الەمنىڭ بىردە-بىر مەملەكەتى، بىردە-بىر ساياسي جۇيە، بىردە-بىر ساياسي ءتارتىپ قورعالعان ەمەس. سوندىقتان بۇل ىندەتكە بىرلەسە قارسى تۇرۋىمىز قاجەت.
قوعامنىڭ بارلىق كۇش-جىگەرىن بىرىكتىرىپ، وسى دەرتتىڭ ودان ءارى ۋشىقپاۋىنا جول بەرمەي، ونى توقتاتۋدىڭ بارلىق امالدارىن قولدانۋ ارقىلى عانا بۇل قۇبىلىسقا ءتيىمدى تۇردە قارسى تۇرۋعا بولادى. سوندىقتان سىبايلاس جەمقورلىقپەن كۇرەسۋ – بارلىق قازاقستان رەسپۋبليكاسى ازاماتتارىنىڭ ازاماتتىق بورىشى دەپ ءبىلۋ قاجەت.