اتالمىش جاتتىعۋ اعىمداعى جىلدىڭ 10 قىركۇيەگىندە اياقتالادى.
جامبىل وبلىسىنداعى «ءايشا-بيبى» وقۋ-جاتتىعۋ پوليگونىندا قازاقستان مەن ءۇندىستان اسكەري قىزمەتشىلەرى اراسىندا «ءقازۇندى-2021» بىرلەسكەن وقۋ-جاتتىعۋى وتۋدە، دەپ حابارلايدى Almaty-akshamy.kz.
وعان قازاقستاننان «وڭتۇستىك» وڭىرلىك قولباسشىلىعىنىڭ بولىمشەلەرى جانە ءۇندىستاننىڭ قۇراما روتاعا بىرىكتىرىلگەن اسكەري كونتينگەنتى قاتىسۋدا.
«ءبىرىنشى كەزەڭدە جەكە قۇرام جاۋىنگەرلىك دايارلىقتىڭ جوعارى دەڭگەيىنە كەلتىرۋ ءىس-قيمىلدارىن پىسىقتادى. حالىقارالىق بولىمشەلەردىڭ اسكەري قىزمەتشىلەرى داعدارىس اۋدانىنا مارش جاسادى. قازىرگى ۋاقىتتا مەجەلى جەردە روتالىق تاكتيكالىق قۇراما توپ بولىمشەلەردى جاۋىنگەرلىك ۇيلەستىرۋدى ورىندادى»، – دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
وقۋ-جاتتىعۋ شەڭبەرىندە قوسىمشا بولىمشەنىڭ اسكەري قىزمەتشىلەرى بارلاۋ-ىزدەستىرۋ جانە رەيدتىك ءىس-قيمىلدار جۇرگىزەدى. وقۋ-جاتتىعۋدىڭ سوڭعى كەزەڭىندە بۇۇ-نىڭ مانداتىنا سايكەس داعدارىس ايماعىندا زاڭسىز قارۋلانعان توپتاردى وقشاۋلاۋ جانە جويۋ جوسپارلانعان.
«ءقازۇندى-2021» بىرلەسكەن وقۋ-جاتتىعۋى قازاقستان مەن ءۇندىستان قورعانىس مينيسترلىكتەرى اراسىنداعى ەكىجاقتى ىنتىماقتاستىق جوسپارى شەڭبەرىندە وتكىزىلۋدە. ول اعىمداعى جىلدىڭ 10 قىركۇيەگىندە اياقتالادى.
وقۋ-جاتتىعۋ سانيتارلىق-ەپيدەميولوگيالىق تالاپتاردىڭ قاتاڭ ساقتالۋى ارقىلى وتۋدە. وعان قاتىسۋشىلار بارلىق قاجەتتى كارانتيندىك ءىس-شارالاردان، مەديسينالىق تەكسەرىستەن ءوتىپ، پتر-تەست تاپسىردى.
