23 تامىزدان باستاپ جوبانى ىسكە اسىرۋدىڭ ءۇشىنشى جىلىنا وتىنىمدەر قابىلداندى.
الماتى اكىمى باقىتجان ساعىنتايەۆ مەگاپوليس اكتيۆىنىڭ وتىرىسىندا «بيۋدجەتكە قاتىسۋ» جوباسىنىڭ ۇلەسىن ارتتىرۋ بولىگىندە پرەزيدەنت جولداۋىنىڭ تاپسىرمالارىن ورىنداۋ شارالارى تۋرالى باياندادى، دەپ حابارلايدى Almaty-akshamy.kz.
مەملەكەت باسشىسى قازاقستان حالقىنا جولداۋىندا اباتتاندىرۋ مەن تۇرعىن ۇي-كوممۋنالدىق شارۋاشىلىعىنىڭ بيۋدجەتىنە «حالىقتىڭ قاتىسۋى» ۇلەسىن 10 ەسەگە ارتتىرۋدى تاپسىردى.
باقىتجان ساعىنتايەۆتىڭ ايتۋىنشا، «بيۋدجەتكە قاتىسۋ» جوباسى الماتىدا ەكىنشى جىل جۇزەگە اسىرىلۋدا، 23 تامىزدان باستاپ جوبانى ىسكە اسىرۋدىڭ ءۇشىنشى جىلىنا وتىنىمدەر قابىلداندى.
ماسەلەن، ەكى جىل ىشىندە ساياباقتار، سكۆەرلەر، اۋلالاردى اباتتاندىرۋ، قوعامدىق ورىنداردى جارىقتاندىرۋ مەن جوندەۋگە قۇنى 7،3 ملرد تەڭگە بولاتىن 322 جوبا (2020 ج. - 49 جوبا، 2021 ج. - 273 جوبا) جۇزەگە اسىرىلدى.
بۇل جوباداعى بيۋدجەتتىڭ ۇلەسى 5%-دى قۇرايدى، بۇل بەلگىلەنگەن ەڭ تومەنگى كولەمنەن 10 ەسە كوپ. ەڭ تومەنگى كولەم «تۇرعىن ۇي-كوممۋنالدىق شارۋاشىلىق» فۋنكسيونالدىق توبى ءۇشىن جىلدىق بيۋدجەتتىڭ 0،5%-ىنان كەم ەمەس. ال ەكى اۋداندا – الاتاۋ مەن ناۋرىزبايدا بيۋدجەتتىڭ ۇلەسى ەڭ تومەنگى شەكتى دەڭگەيدەن 15 ەسە جوعارى.
«بولاشاقتا «بيۋدجەتكە قاتىسۋ» جوباسى اياسىندا ءبىز قارجىلاندىرۋدى كوبەيتىپ قانا قويماي، اتاپ ايتقاندا، قالانىڭ شەتكى بولىگى ءۇشىن جوبالاردى ىرىكتەۋ پروسەدۋرالارىن ودان ءارى جەتىلدىرۋدى جوسپارلاۋدامىز. ياعني، جىل بويى تۇرعىنداردىڭ ۇسىنىستارىن جيناۋ جوسپارلانۋدا»، - دەدى باقىتجان ساعىنتايەۆ.