قازاقستاندا تاجىكستانمەن بىرلەسكەن 418 كاسىپورىن جۇمىس ىستەپ تۇر
قازاقستان مەن تاجىكستان اراسىندا جۇك تاسىمالى ارتىپ كەلەدى. بيىل ءبىرىنشى توقساندا تەمىرجول كولىگىمەن ترانزيتتىك تاسىمال كولەمى 28 پايىزعا وسكەن، دەپ حابارلايدى Almaty-akshamy.kz.
سونىمەن قاتار، وسى كولىكتىڭ تۇرىمەن ەكسپورت-يمپورت كولەمى 20 پايىزعا كوتەرىلگەن. بۇگىن ءبىزدىڭ ەل مەن تاجىكستاننىڭ 300-دەن اسا كاسىپكەرى باس قوسقان بيزنەس-فورۋمدا ەكى ەلدىڭ ەكونوميكالىق قارىم-قاتىناسى ءسوز بولدى. كەلىسىم نەگىزىندە جالپى سوماسى 2 ميلليارد دوللار بولاتىن بىرنەشە قۇجاتقا قول قويىلدى. جيىندا قازاقستاننىڭ ساۋدا ءمينيسترى سەرىك جۇمانعارين ءبىزدىڭ ەل تاجىكستانعا بيداي مەن ۇن ەكسپورتىن ارتتىرۋعا دايىن ەكەنىن مالىمدەدى.
«بيىلدىڭ وزىندە ماۋسىمارالىق كەزەڭدە تاجىكستاننان قازاقستانعا الەۋمەتتىك ماڭىزى بار اگروونىمدەردى جەتكىزۋ تۋرالى ۋاعدالاستىققا قول جەتكىزىلدى. بۇل ءبىزدىڭ ءوزارا ءىس-قيمىلمىزدىڭ شەگى ەمەس ەكەنىنە سەنىمدىمىن. مەنىڭ تاپسىرمام بويىنشا بيىل قازاقستاندىق بيزنەس وكىلدەرى بار بىرنەشە دەلەگاسيا سول ەلگە بارىپ كەلدى. تاجىكستانعا جىلى قابىلداعانى ءۇشىن العىس ايتقىم كەلەدى. ءبىز ءوز تاراپىمىزدان كۇنباعىس مايى، بيداي جانە ۇن ەكسپورتىن ارتتىرۋعا دايىنبىز»، – دەدى ق ر پرەمەر-مينيسترىنىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين.
ءقازىر قازاقستاندا تاجىكستانمەن بىرلەسكەن 418 كاسىپورىن جۇمىس ىستەپ تۇر. ونىڭ 98 پايىزى شاعىن بيزنەس ەكەن. ءوز كەزەگىندە تاجىكستاننىڭ ۆيسە-پرەمەرى سۋلايمون ءزيوزودا ەكى ەل اراسىنداعى ىنتىماقتاستىقتى جوعارى باعالايتىنىن ايتىپ، تاجىكستاندا قازاقستان كاپيتالىنىڭ قاتىسۋىمەن 100-دەن استام بىرلەسكەن كاسىپورىن قۇرىلىپ، جۇمىس ىستەپ جاتقانىن جەتكىزدى. ونەركاسىپتىك كووپەراسيا سالالارىن كەڭەيتۋگە قولداۋ جاسالىپ وتىر ەكەن.
«تاجىك-قازاق قارىم-قاتىناستارىندا ىنتىماقتاستىقتىڭ ەكونوميكالىق بولىگىن كەڭەيتۋ تۇرعىسىندا زور مۇمكىندىكتەر بار ەكەنىن اتاپ وتكىم كەلەدى. بۇگىندە تاجىكستاندا ەكونوميكاعا ينۆەستيسيا تارتۋ ءۇشىن بارلىق جاعداي جاسالعان. بانك جانە ەكونوميكانىڭ ناقتى سەكتورلارىن قولداۋعا نازار اۋدارىلىپ وتىر. سيفرلىق ەكونوميكانى دامىتۋ جانە يننوۆاسيالىق تەحنولوگيالاردى ەنگىزۋ سالاسىنداعى ىنتىماقتاستىقتى جانداندىرۋ ەكى ەلدىڭ الەمدىك دەڭگەيدە باسەكەگە قابىلەتتىلىگىن ارتتىرۋعا ىقپال ەتە الادى»، – دەدى تاجىكستان ۆيسە-پرەمەرى سۋلايمون ءزيوزودا.