الماتىدا تىل ەڭبەككەرلەرىنە قۇرمەت كورسەتىلدى

ءىس-شارادا سوعىس تاقىرىبىنداعى اندەر شىرقالدى

الماتىدا تىل ەڭبەككەرلەرىنە قۇرمەت كورسەتىلدى. ۇلتتىق ۇلان وڭتۇستىك وڭىرلىك قولباسشىلىعىنىڭ قىزمەتكەرلەرى مەن ساربازدارى ولاردى «شاڭىراق» الەۋمەتتىك ورتالىعىنا ارنايى قۇتتىقتاپ بارىپ، سىيلىعىن تارتۋ ەتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.

ەسترادا جۇلدىزدارىنىڭ قاتىسۋىمەن مەرەكەلىك باعدارلاما ۇيىمداستىرىلدى. جەڭىس كۇنى قارساڭىندا وتكەن ءىس-شارادا سوعىس تاقىرىبىنداعى اندەر شىرقالدى.

«بۇگىن ۇجىممەن بىرگە «گەنەرال» دەگەن توپ كەلدى. ول توپ وسىدان 9 جىل بۇرىن قورعانىس ءمينيسترى رۋسلان فاتيح ۇلىنىڭ باستاماسىمەن قۇرىلعان ەدى»، – دەدى ۇلتتىق ۇلان وڭتۇستىك وڭىرلىك قولباسشىلىعىنىڭ باسقارما باستىعى ارمان سەيىتوۆ.

بۇگىندە قالاداعى «شاڭىراق» الەۋمەتتىك ورتالىعىندا 273 ەگدە جاستاعى قاريا تۇرادى. ولاردىڭ اراسىندا 89 مۇمكىندىگى شەكتەۋلى جان بار. ال 27 قاريا – تىل مايدانگەرى. باسقارما باسشىسىنىڭ ايتۋىنشا، جەڭىستىڭ 78 جىل تولۋىنا ارنالعان بيىلعى مەرەكەدە ولاردىڭ ەشقايسىسى ەسكەرۋسىز قالمايدى.

«ءار كۇنىمىز بۇگىنگىدەي مەرەكەگە ۇلاسسىن. بالالارىمىزدىڭ ۇيقىسى تىنىش بولسىن. ءبىز كورگەن قيىندىقتى، بەينەتىمىزدى كەيىنگى ۇرپاق كورمەسە ەكەن دەپ تىلەيمىن. مەرەكەدەن مەرەكەگە امان جەتەيىك»، – دەدى تىل ارداگەرى ۆالەنتينا ەرشوۆا.