2025 جىلعى 23–27 تامىز ارالىعىندا الماتى قالاسىنا ساۋد ارابياسى كورولدىگىنىڭ قاجىلىق جانە ۇمرا ءمينيسترى تاۋفيق بەن فاۋزان ار-رابيا باستاعان دەلەگاسيا رەسمي ساپارمەن كەلدى، دەپ حابارلايدى aqshamnews.kz
ءىسساپار اياسىندا تاراپتار قاجىلىق جانە ۇمرا سالاسىنداعى ىنتىماقتاستىقتى دامىتۋ، قاجىلىق ينفراقۇرىلىمىن جەتىلدىرۋ، قاجىلارعا كورسەتىلەتىن قىزمەتتەردىڭ ساپاسىن ارتتىرۋ، سونداي-اق مادەني جانە رۋحاني بايلانىستاردى كەڭەيتۋ ماسەلەلەرىن تالقىلادى.
دەلەگاسيا قۇرامىندا ساۋد ارابياسى قاجىلىق جانە ۇمرا مينيسترلىگىنىڭ وكىلدەرى، مەككە مەن ءمادينا قالالارىنىڭ ءتيىستى مەكەمە ماماندارى بولدى. قازاقستان تاراپىنان كەزدەسۋگە ق ر مادەنيەت جانە اقپارات ۆيسە-مينيسترى قانات جۇماباي ۇلى ىسقاقوۆ قاتىستى.
ساۋد ارابياسى قاجىلىق جانە ۇمرا ءمينيسترى تاۋفيق بەن فاۋزان ار-رابيا بۇل ساپاردىڭ ماڭىزىنا توقتالىپ، قازاقستان مەن ساۋد ارابياسى اراسىنداعى تاريحي ءارى رۋحاني بايلانىستاردىڭ ەرەكشە ەكەنىنە نازار اۋداردى.
– بۇل مەنىڭ قازاقستانعا ەكىنشى رەسمي ساپارىم. العاش رەت 2022 جىلى ەلدەرىڭىزگە كەلگەن ەدىم. قازىرگى كەزدەسۋىمىزدىڭ نەگىزگى ماقساتى – قازاقستاننان كەلەتىن قاجىلاردىڭ قاجىلىق راسىمدەرىن جەڭىلدەتۋ جانە قىزمەت ساپاسىن جاقسارتۋ. سونىمەن قاتار، ەكى ەل اراسىنداعى ءتۋريزمدى دامىتۋ، مادەني بايلانىستاردى نىعايتۋ دا باستى نازاردا. وسىعان وراي قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعانۇلىمەن، سونداي-اق مادەنيەت جانە اقپارات ۆيسە-مينيسترى قانات ىسقاقوۆپەن جەمىستى كەلىسسوزدەر جۇرگىزدىك. ساۋد ارابياسى تاراپىنان قاجىلاردىڭ ساپارىن وڭتايلاندىرۋ، تاريحي مەكەندەرگە زيارات ەتۋ مۇمكىندىكتەرىن كەڭەيتۋ جانە تىكەلەي اۋە قاتىناستارىن ارتتىرۋ ماسەلەلەرى قاراستىرىلدى، – دەدى مينيستر.
ءوز كەزەگىندە قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى ەكى ەل اراسىنداعى رۋحاني قارىم-قاتىناستىڭ ارتىپ كەلە جاتقانىن اتاپ ءوتتى.
– قاجىلىق – مۇسىلماننىڭ بەس پارىزىنىڭ ءبىرى. ەگەمەندىك العاننان بەرى جىل سايىن مىڭداعان وتانداستارىمىز قاسيەتتى ساپارعا اتتانىپ كەلەدى. بيىلدىڭ وزىندە ءتورت جارىم مىڭعا جۋىق قازاقستاندىق قاجىلىق پارىزىن وتەپ قايتتى. ساۋد ارابياسى تاراپىنان كورسەتىلىپ وتىرعان قولداۋ – وسى رۋحاني بايلانىستاردىڭ ناقتى كورىنىسى. قاجىلىق ساپارىنا قاتىستى ۆيزالىق راسىمدەردىڭ جەڭىلدەتىلۋى، تىكەلەي اۋە رەيستەرىنىڭ اشىلۋى، قىزمەت ساپاسىنىڭ ارتۋى – وسى كەلىسسوزدەردىڭ جەمىسى، – دەدى باس ءمۇفتي.
سونىمەن قاتار ناۋرىزباي قاجى تاعان ۇلى ساۋد ارابياسىنىڭ قازاقستانعا دەگەن قۇرمەتىن ەرەكشە اتاپ ءوتتى. ول الداعى ۋاقىتتا دا ەكى ەل اراسىنداعى ىنتىماقتاستىقتىڭ ارتا تۇسەتىنىنە سەنىم ءبىلدىردى.
ساپار اياسىندا ەكى ەل وكىلدەرى قاجىلاردىڭ قاۋىپسىزدىگى، جول قاتىناستارىن جەتىلدىرۋ، ءتاريحي-دىني ورىندارعا زيارات جاساۋ مۇمكىندىكتەرىن كەڭەيتۋ باعىتىنداعى ناقتى ۇسىنىستاردى قاراستىردى.
وسىلايشا، ساۋد ارابياسى قاجىلىق جانە ۇمرا ءمينيسترىنىڭ الماتىعا جاساعان ساپارى قازاقستان مەن ساۋد ارابياسى اراسىنداعى مادەني، رۋحاني ءارى تۋريستىك ىنتىماقتاستىقتى جاڭا دەڭگەيگە كوتەرۋگە جول اشتى.